Donald Trump ka shpërthyer sërish kundër presidentit ukrainas Volodymyr Zelensky, duke e akuzuar atë për zgjatjen e luftës me Rusinë dhe për shfrytëzimin e taksapaguesve amerikanë. Në një postim të ashpër në “Truth Social”, Trump e cilësoi Zelenskyn si një “komedian modest” që ka manipuluar Uashingtonin për të marrë miliarda dollarë ndihma.
Ish-presidenti amerikan sugjeroi se Zelensky është një “diktator pa zgjedhje” dhe la të kuptohet se Ukraina mund të humbasë mbështetjen amerikane nëse ai nuk organizon zgjedhje të reja – një kërkesë që mund t’i hapë rrugën ndërhyrjes ruse në politikën e brendshme të vendit.
“Mendoni pak, një komedian modest i suksesshëm, Volodymyr Zelenskyy, i nxiti Shtetet e Bashkuara të Amerikës të shpenzonin 350 miliardë dollarë, për të shkuar në një luftë që nuk mund të fitohej, që nuk duhej të fillonte kurrë, por një luftë që ai, pa SHBA-në dhe “TRUMP-in”, nuk do të mund ta zgjidhte kurrë. Shtetet e Bashkuara kanë shpenzuar 200 miliardë dollarë më shumë se Evropa, dhe paratë e Evropës janë të garantuara, ndërsa Shtetet e Bashkuara nuk do të marrin asgjë. Pse i përgjumuri Joe Biden nuk kërkoi Barazi, pasi kjo luftë është shumë më e rëndësishme për Evropën sesa për ne – Ne kemi një oqean të madh e të bukur si ndarje. Për më tepër, Zelenskyy pranon se gjysma e parave që i dërguam atij “MUNGON”.
Ai refuzon të ketë zgjedhje, është shumë i ulët në sondazhet në Ukrainë dhe e vetmja gjë në të cilën ishte i zoti ishte ta luante Biden “si një fyell”. Një diktator pa zgjedhje, Zelenskyy më mirë të lëvizë shpejt ose nuk do t’i mbetet një vend. Ndërkohë, ne po negociojmë me sukses një fund të Luftës me Rusinë, diçka që të gjithë pranojnë se vetëm “TRUMP” dhe administrata Trump mund ta bëjnë. Biden nuk u përpoq kurrë, Evropa ka dështuar të sjellë paqen dhe Zelenskyy ndoshta dëshiron të mbajë “trenin e ushqimit”. Unë e dua Ukrainën, por Zelenskyy ka bërë një punë të tmerrshme, vendi i tij është shkatërruar dhe MILIONA kanë vdekur pa qenë nevoja – Dhe kështu vazhdon…” ka shkruar Trump.
Këto komente shënojnë një largim të qartë nga politika tradicionale e SHBA-së, e cila ka mbështetur Ukrainën kundër agresionit rus që nga viti 2022. Ndërkohë, Trump pretendon se ekipi i tij është duke negociuar për t’i dhënë fund luftës, pa përfshirjen e Zelensky-t – një sinjal i mundshëm për afrimin e tij me Kremlinin.
Me këtë retorikë, Trump jo vetëm që sfidon narrativën e mbështetjes amerikane për Ukrainën, por edhe e vendos veten në një linjë më të afërt me Vladimir Putinin, duke shtuar pasigurinë për të ardhmen e politikës amerikane në këtë konflikt.
Tensionimi i marrëdhënieve mes Trump dhe Zelenskit ra në sy edhe pas deklaratës së Trump të martën, ku ai fajësoi Ukrainën për nisjen e luftës.
Zelensky u kundërpërgjigj këtë të mërkurë dhe kritikoi presidentin Trump duke thënë se ai është “i bllokuar në një flluskë dezinformimi”.
Deklarata iu referua pretendimeve të Trump se vlerësimi i miratimit të presidentit ukrainas është vetëm 4%.
Zelenskyy tha se ky pretendim ishte një dezinformatë që vjen nga Rusia dhe se Ukraina ka prova që tregojnë se shifrat janë diskutuar në takimin mes zyrtarëve amerikanë dhe rusë.
“Ne e pamë këtë dezinformim. E kuptojmë se vjen nga Rusia. Ne e kuptojmë dhe kemi prova që ato shifra janë diskutuar midis SHBA-së dhe Rusisë,” tha Zelenskyy.
Komentet e Trump erdhën menjëherë pas takimit të delegacionit amerikan me zyrtarë të lartë rusë në Arabinë Saudite. Trump gjithashtu fajësoi Ukrainën për shpërthimin e luftës.
Zelenskyy vuri në dukje se propaganda ruse ka promovuar narrativën se ai është një lider i paligjshëm, duke pretenduar se mandati i tij i parë presidencial duhej të kishte përfunduar në maj të vitit 2024. Ai theksoi se ky pretendim shpërfill kushtetutën ukrainase, e cila ndalon mbajtjen e zgjedhjeve gjatë gjendjes së jashtëzakonshme, e cila ka hyrë në fuqi që nga pushtimi i plotë i Ukrainës nga Rusia në vitin 2022.
Përkundër kritikave, Zelenskyy shprehu respekt për Trumpin dhe popullin amerikan, por shtoi, “mjerë ata që jetojnë në këtë hapësirë dezinformimi”. Ai gjithashtu tregoi dhe sondazhet e fundit ku tregohej një mbështetje 57% për të.
Kujtojmë se Shtetet e Bashkuara dhe Rusia zhvilluan të martën raundin e parë të negociatave për arritjen e një marrëveshjeje paqeje në Ukrainë.
Në takim morën pjesë vetëm zyrtarë amerikanë dhe rusë, ndërkohë që evropianët janë përjashtuar nga bisedimet. Në takim mungonin edhe përfaqësues nga Ukraina.
Si kundërpërgjigje ndaj lënies jashtë në negociata, Evropa ka vendosur këtë të mërkurë një raund të ri sanksionesh ndaj Rusisë.
Sekretari i Shtetit i Trump, Marco Rubio, sugjeron që evropianët të thirren në tryezën e bisedimeve për të diskutuar lehtësimin e sanksioneve ndaj Kremlinit.
Nga ana tjetër, Moska refuzon kategorikisht përfshirjen e Evropës, pasi sipas tyre mund të hidhnin ide dinake që mund të çojnë në dështimin e negociatave.
Një nga elementët kyç që u diskutua në Riad ishte mbajtja e zgjedhjeve të reja në Ukrainë, me supozimin se presidenti aktual, Volodymyr Zelenskyy, ka gjasa të ulëta për t’u rizgjedhur.
Moska beson se një kandidat tjetër do të ishte më fleksibël dhe më i gatshëm për negociata.
Plani i diskutuar përfshin armëpushim në Ukrainë, zgjedhje të reja dhe më pas firmosjen e një marrëveshjeje paqeje.
