Prej vitit 2018, “Air Albania” hyri në tregun shqiptarë si kompania e parë ajrore shqiptare, e prej asaj dite shumë kanë qenë premtimet jo vetëm të ministrave të linjës por edhe vetë Kryeministrit Edi Rama, i cili shpesh e ka prezantuar si krenaria e Shqipërisë, përmes fluturimeve që do të zhvilloheshin jo vetëm drejt Europës por dhe SHBA-ve.
Sipas burimeve konfidenciale, kjo kompani është në disa procese gjyqësore, si palë e paditur për ekzekutimin e disa veprimeve përmbarimore në lidhje me disa kontrata miliona euro, të cilat nuk janë shlyer në vitet e ushtrimit të aktivitetit të saj.
Avokatja Joana Qeleshi, e cila ka qenë dhe mbrojtësja ligjore e Damir Fazlliç, krahu i djathtë i Argita Malltezit, avokatja e biznesmenëve Sinan Idrizi dhe Klodian Allajbeu, shihet duke vrapuar dyerve të gjykatave për të shmangur rrezikun e falimentit të kompanisë ajrore, për shkak se detyrimet e kësaj kompanie e kalojnë kapitalin e saj.
Nuk është rastësi që avokatja e Argita Malltezit dhe Damir Fazlliç, të jetë personi që lidh biznesmenin Sinan Idrizi, njëri nga ortakët mazhoritarë 41%, ministren Belinda Balluku, e cila në krijimin e kësaj kompanie ka mbajtur postin e Drejtoreshës së “Albcontrol”, ku ky institucion ka 10% të aksioneve të kompanisë ajrore shqiptare dhe ortakut tjetër, që është kompania turke “Turkish Airlines”, e cila ka 49% të aksioneve.
Po i shtrojmë kompanisë ajrore të fluturimeve disa pyetje:
A është e vërtetë që po shtyhet shpallja e falimentimit të kompanisë ajrore deri pas përfundimit të zgjedhjeve të 11 Majit, për shkak se do të dëmtonte imazhin e qeverisë, konkretisht Edi Ramës dhe Belinda Ballukut?
A është e vërtetë që kompania ka miliona euro detyrime ndaj kreditorëve dhe palëve të treta me të cilat kompania ka kontrata shërbimesh dhe mallrash, në të cilat ka vite pa shlyer pagesat financiare, ndërkohë që vazhdon të përdor shërbimet e tyre?
A është e vërtetë që ka pasur ndërhyrje dhe bllokime të disa vendimeve të ekzekutimit të veprimeve përmbarimore për disa kontrata shërbimi?
Çilat janë lidhjet e avokates së kompanisë Joana Qeleshi me individ si Damir Fazlliç, Klodiana Allajbeu dhe një sërë individësh të tjerë që i përkasin influencave të ndryshme nga grupe të caktuara me qëllime politike turke?
