Në konferencën e tij të radhës për shtyp, Sali Berisha u pyet sërish në lidhje me strategjistin e fushatës së PD, Chris LaCivita dhe përse ai nuk gjendet në Tiranë kur na ndajnë më pak se 45 ditë nga zgjedhjet.
“Datën e ardhjes po e lë surprizë për ju – por ju siguroj që do të vijë,” tha kryetari demokrat, duke theksuar edhe një herë se çdo gjë, përfshirë pagesat për La Civitan, do të jetë transparente.
Më tej, kreu i demokratëve sqaroi gjithashtu se një person nga kompania e LaCivita-s do të vendoset me zyrë në Tiranë, ndërsa vetë Chris LaCivita do të udhëtojë herë pas here drejt Shqipërisë.
LaCivita u prezantua nga Berisha si njeriu që me magjinë e tij do të ndihmojë PD-në jo vetëm të vijë në pushtet, por edhe do të ndikojë që Berishës t’i hiqet statusi non-grata në SHBA.
Tingëllon disi e çuditshme që, më pak se 45 ditë nga data e zgjedhjeve, strategjisti kryesor i fushatës së PD-së nuk ka ende një zyrë dhe as staf në Tiranë, ndërsa vetë LaCivita është shfaqur vetë një herë në një konferencë për shtyp në krah të Berishës dhe Mediut.
