Kreu i Partisë Demokratike, Sali Berisha, ka përsëritur akuzat e tij ndaj drejtuesit të Prokurorisë së Posaçme, Altin Dumani, përmes një postimi në rrjetet sociale. Berisha e akuzon Dumanin se po shpërfill dokumente zyrtare që, sipas tij, provojnë përdorimin e 500 milionë eurove në mënyrë të paligjshme në formë prokurimesh publike dhe eventesh elektorale.
“Për Altin Troplinin, dokumentat zyrtare janë letra të vdekura! 500 milionë euro që u përdorën në mënyrë të paligjshme si prokurime publike dhe evente elektorale për të nuk ekzistojnë dhe nuk janë prova!”, shkruan Berisha, duke lënë të kuptohet se SPAK po injoron fakte të rëndësishme, pavarësisht se nuk dihet saktësisht se për çfarë e ka fjalën kreu demokrat.
Sulmet e tij ndaj kreut të SPAK vijnë në një kohë kur Berisha vetë përballet me hetime të hapura nga kjo prokurori, ndërsa retorika e tij publike ka marrë një ton gjithnjë e më të ashpër ndaj institucionit dhe drejtuesve të tij.
