Vrasja tronditëse e gjyqtarit të Apelit të Tiranës, Astrit Kalaja, brenda sallës së gjyqit, ka rikthyer frikën për sigurinë e sistemit të drejtësisë në Shqipëri. Menjëherë pas kësaj ngjarjeje të rëndë, në vend të një reflektimi të thellë, Sali Berisha e ka përdorur për të krijuar mjegull dhe për ta përdorur politikisht.
Në deklaratat e tij, Berisha u përpoq të shprehej si mbrojtës i drejtësisë, duke dënuar vrasjen e gjyqtarit, por, nga ana tjetër, me retorikën e tij të përditshme, ai nuk bën gjë tjetër vetëm se inkurajon dhunën dhe sulmet ndaj prokurorëve të SPAK dhe gjyqtarëve të GJKKO.
Prej më shumë se dy vitesh, Berisha ka sulmuar publikisht me emra konkretë magjistratët që po e hetojnë, duke i linçuar dhe duke i intimiduar, madje duke i quajtur edhe ushtarë të bandave dhe të krimit të organizuar.
Janë po këta prokurorë dhe gjyqtarë që Berisha i sulmon publikisht, të cilët kanë hetuar dhe dënuar disa prej grupeve më të rrezikshme kriminale në vend., duke filluar nga bandat e Shijakut, Durrësit, Fierit dhe Elbasanit.
Pikërisht në këtë klimë, ku një figurë e lartë politike sulmon në mënyrë të përbindshme drejtësinë, krimi merr zemër dhe e sheh atë si partner kundër prokurorisë dhe gjykatës.
Çdo fjalë që delegjitimon gjykatësin, përkthehet në inkurajim për ata që duan ta sulmojnë dhe kjo është arsyeja pse gjyqtari Kalaja nuk është thjesht viktimë e një akti të izoluar, por simbol i një sistemi që po paguan çmimin e një fushate të gjatë nxitjeje urrejtjeje dhe përçmimi ndaj drejtësisë.
Kështu që reagimi i Berishës pas vrasjes së gjyqtarit është tregues i një hipokrizie të thellë, sepse ai prej kohësh ka mbjellë urrejtje dhe sulme të tmerrshme ndaj prokurorëve dhe gjykatësve./nl/TemA
