Partia Demokratike ka dalë me propozime konkrete sa i takon rrëzimit të reformës në drejtësi. Gazeta pak kohë më parë e deklaroi se opozita po përgatitet për një skenar me qëllim zhbërjen e reformimit të gjyqësorit, ndërsa dje ka qenë Lulzim Basha ai që e tha hapur. Në një konferencë shtypi, kreu i PD vendosi disa kushte ndaj mazhorancës sa i takon ligjit për magjistratët dhe çështje të tjera që do kërkojnë votat e opozitës.
Basha e tha hapur se PD kërkon rrëzimin e të gjitha ligjeve të reformës në drejtësi dhe bllokimin e vetingut. “E para dhe hapi kryesor është t’i qëndrojmë besnikë konsensusit të 21 dhe 22 korrikut 2016. Që do të thotë; zhbërje të të gjithë rregullave ligjore që janë miratuar me dyer të mbyllura të njëanshme nga ana e mazhorancës në kundërshtim me frymën e konsensusit të arritur në ndryshimet kushtetuese, në kundërshtim me vetë parashikimet e Kushtetutës.
Ne i kemi bërë disa nga këto propozime. i kemi shkruar, i kemi bërë drafte, i kemi paraqitur në Këshillin e Legjislacionit, por natyrisht që vlerësimi duhet të jetë shumë më i plotë dhe i thellë duke pasur parasysh që ato propozime janë bërë para se të kolapsonte tërësisht Gjykata Kushtetuese dhe ajo e Lartë dhe para se të kapej edhe Prokurori i Përgjithshëm”, tha Basha.
Por ky propozim i Lulzim Bashës, do të thotë rrëzim të 13 ligjeve të reformës në drejtësi dhe diskutime miratim nga e para. Momentalisht Parlamenti ka miratuar 15 ligje nga 27 që ka paketa e reformës dhe nga këta 15 vetëm 2 janë miratuar me konsensus me PD: Ligji për SPAK dhe ndryshimet Kushtetuese. Të gjithë ligjet e tjera duke filluar nga vetingu, ligji për organet e reja, për statusin e gjyqtarëve, Kodi Penal, Kodi i Procedurës Penale, etj, janë miratuar vetëm me votat e PS-LSI.
Shkarkimi i Arta Markut
Një tjetër kusht i PD është shkarkimi i Arta Markut. Kur u bë emërimi saj opozita bëri luftë para Parlamentit dhe nuk do të dorëzohet deri në largimin e saj. “Çështja e dytë është zgjidhja e situatës së paligjshmërisë në organin e Prokurorisë, ku paligjshmëria ka kapluar gjithë piramidën e prokurorëve, duke i dhënë fund kapjes politike të Prokurorit të Përgjithshëm e cila pastaj ka çuar në emërime politike, antiligjore, antikushtetuese, të prokurorëve të ndryshëm siç është emërimi në Prokurorinë e Krimeve të Rënda dhe në prokurori të tjera të vendit. Një autoritet që prokurori i përkohshëm nuk e ka as me ligjin antikushtetues mbi bazën e të cilit është emëruar”, tha Basha.
Bllokimi i KLGJ e KLP
Lulzim Basha ka propozuar dje që të rihapet gara për KLGJ e KLP. Momentalisht Parlamenti ka zgjedhur me short 10 anëtarë të tyre, që vijnë nga shoqëria civile dhe nga juristët. Ndërsa 12 të tjerë do zgjidhen nga gjykata dhe prokuroria, në mënyrë që këto organe të funksionojnë. Për Bashën emrat e zgjedhur nuk janë të duhurit. “Zgjidhja e situatës së paligjshmërisë në procedurën e përzgjedhjes së anëtarëve të jashtëm të KLGJ-së e KLP-së duke eliminuar nga gara të gjithë kandidatët që nuk plotësonin kriteret kushtetuese ligjore apo ishin përjashtuar nga OMN-ja dhe duke përsëritur procedurën e zgjidhjes. Një proces administrativ që është bërë në kundërshtim me ligjin dhe sipas ligjit është absolutisht e pavlefshme. Dhe këtu ka standard që mazhoranca i ka ndjekur shumë mirë në disa raste të mëparshme dhe të njëjtin standard duhet të ndjekë edhe këtu. KLGJ dhe KLP dhe anëtarët jo gjyqtarë dhe prokurorë duhet të zgjidhen sipas Kushtetutës dhe jo sipas qejfit apo ligjeve të njëanshme të mazhorancës dhe procedurave të shkelura edhe të këtyre ligjeve të njëanshme”, tha Basha. Madje kreu demokrat dje tha se PD ka hartuar dhe drafte me nenet konkrete ku duhet të ndërhyhet dhe pritet të prezantohen. Gazeta ka mësuar se në shtator PD do i vendos kusht këto propozime, si për reformën zgjedhore, ashtu dhe për ndryshimin e neneve që ka rrëzuar Kushtetuesja. Në mënyrë që KLGJ e KLP të funksionojë duhen ndryshuar disa nene që rrëzoi gjykata dhe pa votën e PD kjo është pamundur. Mësohet se PD do e shfrytëzojë këtë për rishikimin e të gjitha ligjeve. /Kliti Topalli
