Dy burra u arrestuan mbrëmjen e së shtunës nga autoritetet franceze pasi dyshohet se ishin pjesë e bandës prej 4 personash që kreu vjedhjen në Muzeun e Luvrit në Paris më 19 tetor, raporton Le Parisien. Dy personat, me origjinë nga Seine-Seint-Denis, janë të njohur nga autoritetet për vjedhje me thyerje.
Njëri prej tyre po përgatitej që të largohej jashtë vendit, dyshohet në Algjeri, dhe u arrestua në Aeroportin Roissy. Tjetri u arrestua më vonë në Paris. Mbi 100 oficerë janë angazhuar në hetim. Sipas Prokurores Publike të Parisit, Laure Beccuau, më shumë se 150 mostra u morën në vendin e ngjarjes.
Të dielën e kaluar, hajdutët përdorën një ashensor lëvizës për t’u ngjitur në Muze dhe thyen dritaren që të çonte në Galerinë Apollo, vitrinën e muzeut për Xhevahiret e Kurorës Franceze, dhe vodhën thesare mbretërore që u përkisnin disa sovranëve francezë, përfshirë Perandoreshën Eugenie, gruan e Napoleonit III. Grabitësit arritën që të merrnin 8 bizhuteri, stolitë e Mbretëreshës Marie-Amélie, varëset dhe vathët e Marie-Louise, me një humbje të vlerësuar prej 88 milionë eurosh.
Hajdutët lanë disa gjurmë: një jelek, një helmetë motoçiklete, etj. Në helmetë u gjetën flokë që i përkisnin një hajduti, me shumë mundësi i pari që hyri në muze. Të dyshuarit gjithashtu nuk arritën t’i vinin flakën pajisjeve që përdorën për grabitjen. Vjedhja e kryer në një vend të tillë ka ngjallur vëmendje ndërkombëtare, midis habisë nga zgjuarsia e autorëve dhe pyetjeve në lidhje me sigurinë e Luvrit.
“Ne do t’i gjejmë autorët”, premtoi ministri i ri i Brendshëm, Laurent Nuñez.
