Ditën e djeshme Gjykata Kushtetuese konfirmoi Erion Veliajn si kryetar të Bashkisë Tiranë, duke rrëzuar në një votim 5 me 3, propozimin e Këshillit Bashkiak, vendimin e Këshillit të Ministrave për shkarkimin dhe dekretin e presidentit Bajram Begaj për mbajtjen e zgjedhjeve në Tiranë më 9 nëntor.
Avokati Spartak Ngjela komentoi edhe deklaratën e Veliajt në Kushtetuese në seancën e 31 tetorit, se ai u rrëmbye nga zyra dhe u burgos pa të drejtë.
“Nëse ka shkelje ligjore të kësaj natyre, Veliaj duhet bëjë kallzim penale. Nuk ka lidhje Gjykata Kushtetuese me këtë.
Ajo e zbatoi Kushtetutën, tha se është i zgjedhur dhe kthehet në detyrë. Nëse kundër tij mund të jenë bërë shkelje të tjera që janë vepra penale, nuk është kjo kompetencë e Gjykatës Kushtetuese.
Me këtë dua të them, që ajo është maja e shoqërisë së një shteti, është organi më i lartë i shtetit demokratik”,- tha Ngjela në “Frontline” në Report Tv.
Sipas avokatit, vendimi i Gjykatës Kushtetuese në favor të Veliajt, i lehtëson atij procesin penal.
“Duhet të shikojmë arsyetimin. Duke e marrë në mënyrë apriori, them se do ta lehtësojë. Është gabim në jurisprudencë, drejtësi dhe kushtetutë që një njeri që ka marrë qindra mijëra vota të arrestohet nga një individ ose disa individ të një instuticioni ligjor për pretendimet e tyre, kur ai duhet të gjykohet i lirë.
Këtë tha dhe Gjykata Kushtetuese, sepse nuk është personaliteti i tij, është personaliteti ynë që e kemi votuar”,- tha Ngjela.
