Ish-kryeministri Sali Berisha do të përballet për herë të parë me SPAK, më 14 nëntor, gati 15 vite pas krimit shtetëror të 21 janarit, ku u vranë 4 protestues në Bulevard.
Për avokatin Romeo Kara, kjo thirrje e Berishës në SPAK për ’21 janarin’ është e vonuar, pasi kanë kaluar shumë vite. I ftuar në një lidhje skype për emisionin ‘Studio Live’ në Report Tv, Kara tha se 21 janari është një vrasje shtetërore, pasi të tillë e ka cilësuar edhe Strasburgu.
‘Rihetimi për këtë çështje ka filluar në 15 korrik të këtij të këtij viti sipas një vendimi të gjykatës së lartë që ka pasur atë të Stasburgut. Që jemi vonë në lidhje me këtë çështje jemi sepse jemi 14 vite me pas, por rëndësi ka që drejtësia të thotë fjalën e saj. Tani po hetohet në 3 drejtime për vrasje të cilësuar në bashkëpunim për prishje të prove dhe për pengim të drejtësisë është edhe një pikë tjetër, por këtu u hap një diapazon të ri në lidhje me këtë çështje dhe shpresojmë që të hetohet mirë i gjithë zinxhiri komandues që ka dhënë urdhër për të qëlluar.
Të gjithë kemi bindjen se është një vrasje shtetërore sepse kështu e ka cilësuar edhe Strasburgu, por shpresojmë se provat që janë paraqitur edhe dëshmitë e njerëzve të rinjë që janë thirrur shpresojmë që tani të kemi personat real përgjegjës lidhur me ato vrasje’, tha ai.
Teksa shpreson që personat përgjegjës që kanë urdhëruar që të qëllohet ndaj protestuesve të vihen para përgjegjësisë, avokati tha se hetimi do të vijojë edhe pas dëshmive që do të marrë SPAK nga personat që kanë dijeni.
‘Hetimi do të vazhdojë, ata janë thirrur si persona që janë në dijeni më pas do të shohim se kush prej tyre do të implikohet për t’u përballur me akuzë nëse do të ketë. 14 vite janë shumë, por shpresojë se organi i akuzës t’ja dalë që të zbulojë të vërtetën’, tha ai.
