Sot pritet të zhvillohet në GJKKO seanca e radhës paraprake për dosjen e Ilir Metës, Monika Kryemadhit dhe tre personave të tjerë. Gjyqtarja Irena Gjoka do të vendosë nëse çështja do të kalojë për gjykim apo do të kthehet për rishqyrtim.
Seanca e kaluar paraprake u shty për shkak të mungesës së avokatit të Monika Kryemadhit. Gjatë seancës, gjyqtarja Gjoka vendosi gjithashtu pezullimin e afateve të paraburgimit për ish-presidentin Meta. Mbrojtësi ligjor i Metës akuzoi gjyqtaren Gjoka se është nën presion nga prokurorët e SPAK, duke pretenduar se ajo po hetohet për akuza të ngritura më herët nga Sali Berisha lidhur me një dënim të fshehur për falsifikim dokumentesh në Greqi.
Një tjetër përplasjeje në sallë ishte njoftimi i prokurorëve të SPAK për një provë të re, një letërporosi e ardhur nga SHBA që lidhet me pagesa në çështjen e lobimit. Avokati Kujtim Cakrani e cilësoi veprimin e organit të akuzës si shkelje të ligjit, pasi sipas tij hetimet janë mbyllur dhe nuk mund të paraqiten prova të reja.Edhe Meta reagoi nga burgu duke e quajtur një gënjeshtër të SPAK lajmin se ka prova të reja.
SPAK mbylli hetimet më 28 korrik, ndërsa dosjen e kaloi për gjykim në fund të gushtit, e cila përfshiu tre hetime në një aferën CEZ-DIA, lobimin e LSI në SHBA dhe hetimin pasuror. Meta dhe Kryemadhi akuzohen për korrupsion pasiv, pastrim parash dhe mosdeklarim pasurie. Pirro Xhixho akuzohet për korrupsion pasiv të funksionarëve të lartë të kryer në bashkëpunim ndërsa Fatime Kryemadhi akuzohet për pastrim parash, së bashku me Ema Çokun. Meta ndodhet në burg që prej tetorit 2024, ndërsa Kryemadhi me detyrim paraqitje.
