Donald Trump mirëpriti në Shtëpinë e Bardhë Presidentin e Sirisë, Ahmad al-Sharaa, në një koalicion global të udhëhequr nga SHBA-të për të luftuar grupin e Shtetit Islamik.
Trump, u zotua të “bëjë gjithçka që mundet për ta bërë Sirinë të suksesshme”.
Takimi mes dy udhëheqësve në Zyrën Ovale u zhvillua pa praninë e mediave dhe al-Sharaa hyri në ndërtesë përmes West Executive Avenue, ngjitur me Shtëpinë e Bardhë, në vend që të hynte në rrugicën e Krahut Perëndimor që përdoret normalisht për mbërritjet e udhëheqësve të huaj. Ai u largua nga Shtëpia e Bardhë rreth dy orë më vonë.
Me rastin e vizitës historike, Departamenti i Shtetit njoftoi pezullimin e sanksioneve kundër Sirisë për 180 ditë të tjera, në dritën e vendimit të Kongresit të SHBA-së për t’i hequr ato përfundimisht.
Ndërkohë pas takimit, Trump tha për al-Sharaa se “kam besim se ai do të jetë në gjendje ta bëjë punën”, duke theksuar në një postim në rrjetet sociale se planifikon të takohet dhe të flasë përsëri me udhëheqësin sirian.
Në një deklaratë të shkurtër, presidenca siriane tha se të dy udhëheqësit diskutuan “mënyrat për të zhvilluar dhe forcuar” marrëdhëniet dypalëshe, si dhe “disa çështje rajonale dhe ndërkombëtare”.
Në një postim në platformën X, Ministri i Informacionit Hamza al-Mustafa njoftoi se Siria kohët e fundit nënshkroi një marrëveshje bashkëpunimi me koalicionin ndërkombëtar anti-xhihadist të formuar në vitin 2014 për të mposhtur Shtetin Islamik (IS).
“Marrëveshja është politike dhe deri më tani nuk përfshin komponentë ushtarakë”, shpjegoi ai.
Ahmed al-Sarra mori pushtetin në Damask dhjetorin e kaluar si kreu i një koalicioni islamist që rrëzoi Presidentin Bashar al-Assad. Që atëherë, ai ka udhëtuar gjerësisht jashtë vendit, ndërsa qeveria e tij kalimtare kërkon ta nxjerrë Sirinë nga izolimi ndërkombëtar me të cilin u përball nën Assadin.
