Kryeministri belg, Bart De Wever, ka kritikuar ashpër propozimin e Komisionit Evropian për të përdorur asetet e ngrira ruse për ndihmë ndaj Ukrainës, duke e cilësuar këtë veprim si “vjedhje” të parave të bankës qendrore ruse.
Në një intervistë për VRT NWS, De Wever e përshkroi këtë plan si “radikal” dhe “jashtëzakonisht të papjekur dhe të menduar keq”, duke theksuar se ekzistojnë alternativa më të mira për të mbështetur Ukrainën.
Ai nuk e përjashtoi mundësinë e nisjes së një procesi ligjor kundër Komisionit Evropian për të bllokuar këtë vendim.
Debati mbi këtë propozim ka ndezur diskutime në të gjithë Evropën, ku politikanët dhe ekspertët juridikë vlerësojnë implikimet ligjore dhe etike të përdorimit të aseteve të ngrira ruse në kontekstin e konfliktit të vazhdueshëm në Ukrainë.
Ndërkohë, vendimi pritet të ketë ndikim të madh në marrëdhëniet diplomatike midis BE-së dhe Rusisë, si dhe në mënyrën se si vendet evropiane mund të mbështesin Kievin pa shkelur ligjin ndërkombëtar.
Ditë më parë, De Wever, në një intervistë për La Libre deklaroi se idetë për një disfatë strategjike të Rusisë janë “përralla dhe iluzione”.
Sipas tij, askush në Perëndim nuk beson realisht në një skenar ku Moska del e mundur.
De Wever shtoi se asetet e ngrira ruse – të mbajtura aktualisht nga vendet perëndimore – në fund do të duhen kthyer sërish në duart e Kremlinit.
Kjo është një deklaratë e fortë, që bie ndesh me linjën dominante të Bashkimit Evropian dhe hap një debat të ri mbi pritshmëritë e Perëndimit në luftën në Ukrainë. Dhe mbi të gjitha, që artikulohet për të parën herë plotësisht nga Brukseli, edhe pse jo drejtpërdrejt prej strukturave evropiane.
Belgjika ndërkaq ka akuzuar BE-në se po i “minimizon” shqetësimet e saj në lidhje me një plan për të përdorur asetet e ngrira ruse të mbajtura në Evropë për të mbështetur Ukrainën.
“Ne vazhdojmë të kërkojmë një alternativë, përkatësisht që BE të marrë hua shumat e nevojshme në tregje”, thotë ministri i Jashtëm belg Maxime Prévot.
Propozimi i BE-së, i cili është mbështetur nga Kancelari gjerman, Friedrich Merz, parashikon që 140 miliardë euro të aseteve shtetërore ruse të mbajtura në Belgjikë të transformohen në një “kredi dëmshpërblimi” për të mbështetur financiarisht Kievin vitin e ardhshëm.
Shumica e vendeve të BE-së e mbështesin planin dhe disa i kanë kritikuar belgët për bllokimin e tij. Belgjika argumenton se një veprim i tillë do të rrezikonte një marrëveshje paqeje në afat të shkurtër dhe do të rrezikonte veprime ligjore nga Rusia në të ardhmen.
Rusia e ka dënuar propozimin dhe një nga bankierët e saj kryesorë e ka kërcënuar BE-në me 50 vjet padi nëse ideja bëhet realitet.
Komisioni Evropian është gati të propozojë mënyra për zgjidhjen e ngërçit, por Maxime Prévot është ankuar se teksti që po paraqitet të mërkurën “nuk i adreson shqetësimet tona në mënyrë të kënaqshme”.
Vendet e BE-së kanë përdorur tashmë fitimet e gjeneruara nga rreth 210 miliardë euro të aseteve të ngrira ruse për të financuar mbrojtjen e vazhdueshme të Ukrainës pas pushtimit në shkallë të plotë në shkurt 2022.
Por përdorimi i vetë aseteve ka rezultuar shumë më i diskutueshëm.
