Gjykata e Apelit hoqi masën e arrestit shtëpiak ndaj sipërmarrëses Elisabeta Dosti, për të cilën më herët prokuroria njoftoi se e kishte nën hetim për transferimin e gati 1 milion eurove në llogari të saj.
Dosti këmbënguli se nuk kishte kryer asnjë veprim të paligjshëm, se nuk kishte përvetësuar pasuri dhe nuk kishte falsifikuar dokumente.
Zbutja e masës ndaj sipërmarrëses u krye përballë garancisë pasurore prej 5 milionë lekësh.
Nga ana tjetër, prokuroria ka bërë të ditur publikisht se Dosti, si përfaqësuese e shoqërisë “Prodhim Veshje nr. 02”, kaloi toka dhe ndërtesa të shoqërisë te një kompani tjetër. Këtë konkluzion zyrtar të prokurorisë, e dyshuara Dosti e konsideroi si një zhurmë që kishte tejkaluar kufijtë e të vërtetës.
Deklaratë e zonjës Dosti:
Në vijim të një sërë publikimesh të fundit, ndjej detyrimin publik dhe qytetar të reagoj qartë dhe pa ekuivok. Lajmet e shpërndara ndaj meje nuk kanë qenë thjesht të pasakta, por të ndërtuara në mënyrë të qëllimshme dhe dashakeqe, duke deformuar faktet dhe duke synuar drejtpërdrejt dëmtimin e figurës sime personale.
Sot, Gjykata e Apelit ka pranuar kërkesën time dhe ka hequr masën e sigurimit “arrest në shtëpi”. Ky vendim përbën një akt të qartë drejtësie dhe rrëzon bazën mbi të cilën u ndërtuan akuzat publike dhe narrativa e rreme që u servir në opinion pa përgjegjësi profesionale. Drejtësia foli aty ku zhurma mediatike kishte tejkaluar kufijtë e së vërtetës.
Gjatë gjithë këtij procesi jam përballur me situatën me qetësi, vetëpërmbajtje dhe dinjitet, duke zgjedhur të mos reagoj ndaj provokimeve, por t’i besoj ligjit dhe institucioneve.
Mbrojtja ime ligjore është përfaqësuar me profesionalizëm, integritet dhe vendosmëri nga Avokate Xhoi Nela, të cilës i shpreh publikisht mirënjohjen time për një mbrojtje serioze dhe të pakompromis ndaj së vërtetës.
E deklaroj në mënyrë të prerë: Nuk kam kryer asnjë veprim të paligjshëm, nuk kam përvetësuar pasuri, nuk kam falsifikuar dokumente dhe nuk kam dëmtuar interesat e askujt. Çdo pretendim i kundërt ka qenë i pabazuar dhe i ushqyer nga keqinformimi dhe dashakeqësia.
Çdo publikim i mëtejshëm i pavërtetë, denigrues apo keqdashës do të ndiqet me të gjitha mjetet që parashikon ligji.
Dinjiteti im personal, si edhe pastërtia e figurës sime, nuk janë ndërtuar sot për t’u mbrojtur, por janë formuar ndër vite pune, korrektësie dhe përgjegjësie. Ato kanë qenë dhe do të mbeten gjithmonë pjesë e pandashme e emrit tim.
E bindur se e vërteta dhe ligji do të mbizotërojnë, dhe se emri im do të qëndrojë i pastër, ashtu siç ka qenë gjithmonë. /Elisaveta Dosti
