Kryeministri Edi Rama në konferencën e fundit përballë gazetarëve për këtë vit u ndal dhe te kërkesa e opozitës për dorëheqjen e tij, ndërsa me çudi pyeti se përse duhej ta jepte, duke kujtuar se kishte fituar 83 mandate.
Rama shtoi se AKSHI është institucioni për të cilën kjo qeveri është krenare, pavarësisht skandalit që po heton SPAK.
“Ky vit është viti më i suksesshëm i Shqipërisë. Shqipëria është vendi ku këtë vit që po mbyllim, u mblodh tërë Europa politike në Sheshin Skënderbej. Erdhën në vendin e korruptuar mendoni ju? Jo! Por nuk morën opinionin e 700 tenxhereve politike. KE e fal një vend që do të ishte jo ky që thonë tenxheret, por 1/10 e tij, kurrë! Asnjëherë. Nëse po ndodh sot ky proces, është miritë e kësaj force politike.
S’keni për të dëgjuar kurrë asnjë sharje nga unë fjali apo presione e kërcënime ndaj këtyre organeve. Ky është një proces i pashmangshëm, i domosdoshëm. Ça është ky muhabet? Jep dorëheqjen? Për çfarë? Për cilën? Për AKSHIN? AKSHI, është një institucion krenarie për ne! Që të jemi të qartë ne. Jo për të ulur kokën, por për të qenë krenarë.
Është një institucion për të qenë krenar sepse; kemi qenë këtu ne, kur duhej të shkonit të mbanit radhën dhe për një certifikatë. Edhe kur ata që kishit jashtë, duhet të vinin këtu se nuk kishte shans që të merrnin një copë nga atje jashtë.
620 mln lekë ka kursyer AKSHI, që janë 620 mln euro, për shqiptarët. U kursyen këto lekë falë dixhitalizimit. 7600 vite në radhe, janë 25 mijë fluturime rreth tokës. Këto ka bërë AKSHI.”, tha ai.
