Vrasja e një gruaje nga një agjent i ICE në Minneapolis: përplasje mes autoriteteve federale dhe lokale
Zyrtarë federalë dhe drejtues lokalë u përplasën të mërkurën për interpretimet e tyre të ndryshme lidhur me vrasjen e një gruaje nga një oficer i Shërbimit të Emigracionit dhe Doganave (ICE) në Minneapolis.
Ndërsa administrata e presidentit Donald Trump e përshkroi vrasjen e një nëne 37-vjeçare si akt vetëmbrojtjeje, në kuadër të ofensivës së saj më të fundit kundër emigracionit, autoritetet e Minneapolis e kundërshtuan këtë narrativë.
Ja çfarë dihet deri tani për të shtënat:
Si ndodhi ngjarja
Gruaja u qëllua brenda makinës së saj në një lagje banimi në jug të qendrës së Minneapolis, rreth një milje (1.6 kilometra) larg vendit ku policia vrau George Floyd-in në vitin 2020. Video të filmuara nga kalimtarë dhe të publikuara në rrjetet sociale tregojnë një oficer që i afrohet një SUV-je të ndalur në mes të rrugës, i kërkon shoferes të hapë derën dhe kap dorezën.
Makina Honda Pilot nis të lëvizë përpara dhe një tjetër oficer i ICE-së, që ndodhej përpara automjetit, nxjerr armën dhe qëllon menjëherë të paktën dy herë drejt mjetit nga afër, duke u hedhur pas ndërsa makina lëviz drejt tij.
Nga pamjet nuk është e qartë nëse automjeti ka goditur oficerin. Më pas SUV-ja përplaset me dy makina të parkuara pranë trotuarit dhe ndalet pas një aksidenti. Në video dëgjohen dëshmitarë që bërtasin të tronditur.
Viktima ishte “bashkëshorte dhe nënë”
Renee Nicole Macklin Good vdiq nga plagët e marra në kokë.
Ajo e përshkruante veten në rrjetet sociale si “poete dhe shkrimtare, bashkëshorte dhe nënë”, dhe ishte me origjinë nga Kolorado. Thirrjet dhe mesazhet drejtuar familjes së saj nuk morën përgjigje të menjëhershme.
Sipas të dhënave publike, Macklin Good kishte jetuar së fundmi në Kansas City, Misuri, ku ajo dhe një grua tjetër me të njëjtën adresë kishin hapur vitin e kaluar një biznes të quajtur “B. Good Handywork”.
Në një video të postuar nga vendngjarja, një grua që e përshkruan Macklin Good si bashkëshorten e saj shihet pranë makinës duke qarë. Ajo thotë se çifti kishte ardhur së fundmi në Minesota dhe se kishin një fëmijë 6-vjeçar.
Vrasja shkaktoi menjëherë protesta masive me qindra persona të zemëruar. Ky është të paktën rasti i pestë vdekjeprurës i lidhur me ofensivën agresive kundër emigracionit që administrata Trump nisi vitin e kaluar.
Noem: oficeri veproi sipas trajnimit
Oficeri i ICE-së nuk është identifikuar publikisht. Sekretarja e Sigurisë Kombëtare, Kristi Noem, e përshkroi atë si një oficer me përvojë dhe tha se ai ishte plagosur në qershor pasi ishte zvarritur nga një automjet i një protestuesi kundër ICE-së.
Ajo deklaroi se oficeri u godit nga automjeti gjatë ngjarjes së së mërkurës dhe u dërgua në spital, por më pas u lirua.
“Oficeri ynë ndoqi trajnimin e tij, bëri saktësisht atë që i është mësuar në një situatë të tillë dhe veproi për të mbrojtur veten dhe kolegët e tij të zbatimit të ligjit,” tha Noem.
Sipas saj, oficerët po përpiqeshin të shtynin një automjet nga bora kur një grup protestuesish iu afrua. Ajo shtoi se ata sapo kishin përfunduar një operacion dhe po përpiqeshin të ktheheshin në seli.
Noem tha se gruaja po bllokonte oficerët me automjetin e saj dhe refuzoi t’u bindet urdhrave të forcave të rendit.
“Ajo më pas e shndërroi automjetin në armë dhe tentoi të shtypte me të një oficer të zbatimit të ligjit,” tha Noem. “Kjo duket si një tentativë për të vrarë ose për të shkaktuar dëmtime trupore ndaj agjentëve, një akt terrorizmi të brendshëm.”
Autoritetet lokale kundërshtojnë versionin federal
Shefi i Policisë së Minneapolis, Brian O’Hara, nuk dha asnjë shenjë se shoferja po përpiqej të dëmtonte dikë, kur e përshkroi ngjarjen për gazetarët.
Kryebashkiaku i Minneapolis, Jacob Frey, e quajti përshkrimin e Noem për ngjarjen “marrëzi”, duke thënë se kishte parë videot e incidentit që tregojnë se nuk bëhej fjalë për vetëmbrojtje dhe se ngjarja mund të ishte shmangur. Frey kritikoi gjithashtu dislokimin federal të më shumë se 2,000 oficerëve në zonën e dy qyteteve Minneapolis–St. Paul.
“Ata po i ndajnë familjet, po mbjellin kaos në rrugët tona dhe, në këtë rast, po vrasin njerëz, fjalë për fjalë,” tha Frey./AP
