Avokati Maks Haxhia në një deklaratë për mediet ka reaguar pas akuzave ndaj klientit të tij, Ergys Agasi, duke i cilësuar ato si të pabazuara dhe absurde. Në një deklaratë për mediat, Haxhia thekson se Agasi nuk ka ushtruar asnjëherë funksion publik dhe, për rrjedhojë, nuk mund të mbahet përgjegjës për çështje që lidhen me tendera apo vendimmarrje shtetërore.
“Akuzat ndaj Ergys Agasit janë absurditete. Po i ngrihen akuza për tendera një njeriu që nuk ka pasur dhe nuk ka asnjë funksion publik”, u shpreh Haxhia, duke shtuar se klienti i tij nuk ka pasur kurrë pushtet vendimmarrës në institucionet shtetërore.
Sipas avokatit, Ergys Agasi aktualisht nuk ndodhet në Shqipëri, ndërsa thekson se deri më tani nuk ekziston asnjë provë konkrete që të mbështesë akuzat e ngritura ndaj tij. “Nuk ka asnjë provë për akuzat që i ngrihen. Për këtë arsye, besoj se nuk është i çmendur që të vijë të paraqitet”, deklaroi Haxhia.
Maks Haxhia nënvizoi se aktiviteti i vetëm i klientit të tij ka qenë ai i biznesit privat. “Klienti im merret thjesht me biznes. Ai nuk ka qenë funksionar dhe nuk ka ushtruar asnjë rol publik që mund ta lidhë me këto akuza”, tha avokati.
Maks Haxhia theksoi se ka pasur komunikim me familjarët e Agasit, të cilët sipas tij janë të rënduar psikologjikisht nga mënyra sesi çështja është trajtuar në publik. “Unë komunikimet i kam me familjarët e tij dhe ata janë të ngarkuar nga materialet që janë përhapur dhe nga mënyra sesi janë servirur në publik”, u shpreh ai.
Në fund të deklaratës, Haxhia theksoi se paraqitja ose jo e Ergys Agasit në SPAK është një e drejtë ligjore e tij. “Është e drejta e Agasit që të paraqitet apo jo në SPAK”, deklaroi avokati.
SPAK e akuzon Ergys Agasin për përfshirje në një skemë të dyshuar manipulimi të tenderave publikë pranë AKSHI-t, në bashkëpunim me zyrtarë dhe biznesmenë të tjerë. Akuzat lidhen me shkelje të barazisë në tendera dhe ndikim të paligjshëm në procedurat e prokurimit publik.
