Avokati i Ergys Agasit, Maks Haxhia, është shprehur se klienti i tij ndodhet jashtë Shqipërisë.
Komentet Haxhia i bëri në një deklaratë për mediat para hyrjes së SPAK, ku tha se drejtësia po kërkon ta dëmtojë klientin e tij pa asnjë provë konkrete kundër tij.
Haxhia tha gjithashtu se Ergys Agasi ‘vetëm po të jetë i çmendur që të kthehet në Shqipëri’, pasi sipas tij, segmente të caktuara të drejtësisë po mundohet ‘t’ja hedhin çelësat në det’.
Ai shtoi po ashtu se pala mbrojtëse e Agasit ndodhet në një ‘paralizë’ të plotë, në kushtet e një terri informativ përsa i përket materialeve që përmban dosja e SPAK kundër tij.
Haxhia informoi se i kishte dërguar letër institucioneve më të larta të Drejtësisë, me qëllim nxjerrjen e përgjegjësive të personave që kanë për detyrë ruajtjen e informacionit brenda dosjeve, të cilat sipas tij iu shpërndanë publikut.
“Ne i kemi bërë një letër intitucioneve të larta të drejtësisë, duke nisur nga inpektori i lartë i drejtësisë, KLP dhe prokurorit të çështjes, KLGJ dhe gjyqtarit të çështjes, për të nxjerrë përgjegjësitë ndaj atyre personave që e kanë për detyrë ruajtjen e këtyre informacioneve, që i kanë vënë në dispozicion të publikut. Qoftë përgjegjësia administrative e penale, por ajo që është kryesorja është për të kthyer situatën në normalitet. Sepse ky është një procedim i vitit 2023 dhe ne si mbrojtje nuk kemi absolutisht asnjë material. Kemi vetëm vendimin e parë të caktimit të masave të sigurisë dhe sot unë erdha për të parë nëse është zbardhur vendimi i pyetjes së të pandehurit në bazë të nenit 248, i cili akoma nuk është zbardhur. Dhe në këto kushte, mbrojtja është e paralizuar dhe në kushtet e një terri të plotë informativ lidhur me materialet e dosjes.
Zoti Agasi sipas informacioneve që kam edhe nga familja, nuk ndodhet në Shqipëri. Por nisur nga kjo situatë, e cila është një praktikë që mbarset opinioni dhe ngrihen akuza që janë absurditete që të akuzosh një person të paveshur me pushtet për veprimtari të pushtetit, siç janë shkelja e barazisë në tendera, apo heqja e lirisë së një personi për shkak të mos-pjesëmarrjes në tendera, pasi zoti Agasi nuk ka asnjë aktivitet dhe asnjë lidhje me tenderat në AKSHI. Agasi i ka mbaruar punët e veta, por në këtë terren vetëm po të jetë një njeri që do që t’ja hedhin çëlësin në det, mund të vijë që të paraqitet në organet e drejtësisë. Kjo situatë e cila është krijuar kastile duke ngritur akuza të rënda, bën që zbatimi i masës së sigurisë bën që ai të mos ketë më asnjë shans për të komunikuar me drejtësinë në bazë të të drejtave të tij kushtetuese dhe proceduriale. Megjithatë është vendimi i tij për të ardhur apo për të mos-ardhur. Por në kushtet që nuk ka asnjë informacion dhe provë për akuzat që i ngrihen, vetëm po të jetë i çmendur që të vijë”, tha mes të tjerash Haxhia.
