Pas distancimit të djeshëm të Doktorit nga teza se SHBA do ta merrte Ramën me helikopter si “Ramaduro”, Muli u shqetësua seriozisht.
— Duhet të gjejmë një zgjidhje — i tha Lelos. — Jam shumë keq.
— Po pse, çfarë ke? — i tha Lelo. — Doktori atë e tha për opinion, nuk ka gjë me ty.
— E di — tha Muli — por unë ndihem fajtor edhe kur Doktori duhet të gënjejë. Nuk është pak ta vësh Doktorin në siklet për këtë çështje.
— Po pse të vret ndërgjegjja? — i tha Lelo. — Se nuk je vetëm ti që e ke thënë. E ka thënë edhe Klevesi. Madje e ka shpjeguar me “burime të sigurta nga SHBA”, vetë Gimi Puros.
— Gimi Puros e ka kollaj se është familje enveriste — tha Muli. — Ai u bën qejfin edhe atyre të shtëpisë, edhe Doktorit. Por unë nuk ia fal vetes që e vura në siklet Doktorin. E vërteta është se Doktori e ka pas krahasuar Ramën me Noriegën. Njësoj janë si raste, por ai e ka pas thënë për Noriegën. Për këtë “Maduron” na e mbushi mendjen ky Gimi Puros. Doktorit i pëlqeu, por ne nuk duhet të nxitoheshim. Duhej bërë praktikë strategjike: ta thoshte njëherë ai, pastaj ne.
— E di — tha Lelo — po në shumicën e rasteve ai nuk ka dëshirë ta thotë i pari dhe ne nuk mund të rrimë pa e thënë. Pavarësisht se këto që janë si broçkulla ai t’i ngarkon ty dhe Klevesit, të gjithë duhet të ndihemi fajtorë që s’e kemi thënë. Po ta kishim thënë të gjithë, nuk do dukeshit vetëm ju të dy budallenj tani, por do na vriste ndërgjegjja të gjithëve.
— Sidoqoftë, duhet të bëjmë diçka — tha Muli. — Duhet të themi që Rama do ta pësojë si Noriega. Këtë e ka thënë vetë Doktori, nuk e vëmë në siklet.
— Varet a i duhet — tha Lelo. — Po qe se nuk i duhet, mund të thotë që s’e ka thënë as atë. Mos u nxito njëherë. Le ta thotë Aldo Bumçi, se atë s’e vret ndërgjegjja.
