Stërgjyshi i tij mbërriti nga Kalabria në SHBA-të në vitet ’20, por sot Greg Bovino, 55 vjeç, është figura kyçe e operacioneve kundër emigrantëve pa dokumente në shumë qytete amerikane. Si shef i Policisë Kufitare (Border Patrol), ai është bërë simbol i bastisjeve masive të nisura nga administrata Trump, larg kufirit dhe brenda zonave urbane, shkruan Corriere della Sera.
Bovino u thirr në veprim sepse Shtëpia e Bardhë e konsideronte ICE-n të paaftë për të realizuar numrin e dëshiruar të arrestimeve. Nën drejtimin e tij janë zhvilluar operacione me emra spektakolarë si “Trojan Horse” në Los Angeles, “Midnight Blitz” në Çikago, “Swamp Sweep” në New Orleans dhe “Metro Surge” në Minneapolis.
Këto operacione janë shoqëruar me protesta dhe akuza për përdorim të tepruar force. Video nga Minneapolis tregojnë përdorimin e tymit taktik dhe spray-t me piper kundër protestuesve, përfshirë persona tashmë të shtrirë në tokë. Një gjykatë apeli ka pezulluar një vendim që kufizonte këto praktika, gjë që ka inkurajuar veprime më agresive nga agjentët.
Në Çikago, gjatë një operacioni kundër bandës Tren de Aragua, u arrestuan edhe familje dhe të mitur pa precedentë penalë. Videot promovuese të Border Patrol, shpesh me muzikë ‘heavy metal’, i kanë dhënë operacioneve pamjen e një filmi aksion.
I diplomuar dhe me dy mastera, Bovino iu bashkua Policisë Kufitare në vitin 1996 dhe u bë drejtues në vitin 2020. Ai ka promovuar idenë që Border Patrol të veprojë jo vetëm në kufi, por edhe brenda territorit amerikan.
Më 7 janar 2025, pa autorizim nga administrata Biden, Bovino urdhëroi një bastisje në Kaliforni ku u arrestuan 78 punëtorë peruanë. Edhe pse ai i quajti “kriminelë”, një hetim tregoi se vetëm një kishte precedent penal, ndërsa Bovino e përkufizoi si krim edhe hyrjen pa dokumente në SHBA-të.
Metodat e tij janë mbështetur nga Stephen Miller, një nga figurat më të fuqishme të Shtëpisë së Bardhë. Bovino ka premtuar të arrestojë “llumrin e shoqërisë”, duke përfshirë edhe shkelje si drejtimi i mjetit në gjendje të dehur.
Figura e tij ka ngjallur polemika edhe për stilin: New York Times ka krahasuar veshjen e tij ushtarake me atë të Gestapos, një krahasim që Departamenti i Sigurisë Kombëtare e ka quajtur të rrezikshëm dhe të papranueshëm.
