Karnavalet e Venecias kanë nisur me një paradë shumëngjyrëshe në rrugët dhe kanalet e qytetit historik. Atmosfera festive ka mbledhur qindra pjesëmarrës dhe vizitorë nga e gjithë bota.
Këtë vit, edicioni i Karnavaleve mban temën “Olympus”, duke e lidhur festën me Lojërat Olimpike Dimërore Milano-Cortina. Organizatorët synojnë të ndërthurin traditën veneciane me simbolikën e sportit dhe frymën olimpike.
Si çdo vit, pjesëmarrësit u shfaqën me kostume tradicionale veneciane, por edhe me veshje të frymëzuara nga Olimpiada, mitologjia greke apo personazhe simbolike, përfshirë edhe figurën e Papës.
“Atmosfera është e mbushur me gëzim për Lojërat Olimpike, të cilat duhen vlerësuar gjithmonë, ashtu si sporti në përgjithësi. Duhet të jemi krenarë që Olimpiada zhvillohet këtë vit në Itali dhe që vendi ynë ka kaq shumë për të ofruar”.
“Është e mrekullueshme të shohësh kaq shumë njerëz me kostume. Është një atmosferë shumë e bukur dhe e veçantë”.
Karnavalet e Venecias kanë një histori shekullore. Tradicionalisht, banorët fshihnin identitetin pas maskave për të thyer kufijtë shoqërorë dhe për të lëvizur lirshëm në shoqëri.
Karnavalet e këtij viti kanë promovuar sportin, kulturën italiane dhe identitetin europian përpara publikut ndërkombëtar.
