Sali Berisha, vijoi edhe këtë të enjte takimet me strukturat e partisë në Njësinë 7 në Tiranë. Po të shohësh akuzat, denoncimet dhe mesazhin e Berishës qoftë në konferencën e tij të përditshme me gazetarët, por edhe me strukturat e PD-së, është i njëjtë.
Janë të njëjtat denoncime, e njëjta retorikë polarizuese, të njëjtët emra që qarkullojnë.
Akuza të tilla si “Mandatet e marra me Elvis Doçi, Suel Çelën, Troplinët. Ato mandate e marra me krim kthehen në parzmore. Mbrojnë Lubi Ballukun faktikisht Edi Ramën. Thonë për herë të parë, jo nuk ia heq imunitetin” nuk i bëjnë tashmë askujt përshtypje, sepse në kohë dhe momente të ndryshme kanë ndryshuar vetëm emrat e ‘bashkëpunëtorëve’, sepse objektivi ka qenë i qartë”.
Ai ka vijuar më tej, duke u zotuar: “Ja do vdesim ja do rrojmë po ne atë s’do e pranojmë kurrë. Kemi ardhur gjer tani në fushë betejë, me të drejtën më të madhe. Ka kryer krimin e shëmtuar të farsës elektorale.”
Pavarësisht denoncimeve dhe akuzave të përditshme në raport me mazhorancën, me Edi Ramën, me korrupsionin dhe aferat e tjera, pyetja që Berisha nuk i jep dot përgjigje është se, nëse këto janë të gjitha të vërteta, atëherë pse shqiptarët nuk i bashkohen atij dhe ta bëjnë kryeministër?
Nëse Edi Rama dhe PS-ja i vjedhin zgjedhjet dhe votat me këta emra që përmend Berisha mëngjes dhe mbrëmje, pse nuk i bashkohen demokratët në takimet e tij dhe shqiptarët në protestat e tij? Të paktën, aty nuk i vjedh dhe nuk i manipulon dot Edi Rama.
Në vend që të lodhet shumë mëngjes dhe mbrëmje, madje të zotohet duke sjell në diskutim jetën apo vdekjen, Berisha dhe njerëzit e tij përreth do bënin mirë t’i jepnin përgjigje pikërisht këtyre pyetjeve. Do të ishte shumë më e lehtë për ata!/ TemA
