Shqipëria dhe Kosova do të jenë pjesë e Forcës së Stabilizimit në Gaza që do të ketë formën dhe funksionin e një ushtrie e që do të bashkëpunojë me mijëra policë palestinezë. Plani i bordit të paqes synon të krijojë një forcë prej 20 mijë ushtarësh nga vende të ndryshme. Deri më tani kanë konfirmuar dërgimin e trupave, qeveritë e 5 shteteve ndërsa dy të tjera do të kryejnë trajnimin e policëve palestinezë.
Ende pa një numër specifik të konfirmuar, dihet vetëm që Forcës së Stabilizimit (ISF) do ti bashkohen trupa nga Shqipëria.
‘Shqipëria konfirmoi se do të dërgojë trupa në Gaza si pjesë e Forcës së Stabilizimit që Bordi ka krijuar’, tha Kryeministri i Shqipërisë Edi Rama në fjalën e tij në mbledhjen e Bordit.
Burime i sqaruan Report TV ndërkohë, se Shqipëria do të përfaqësohet me oficerë në Shtabet ushtarake. Në momentin që struktura do të marrë formë, atëherë do të vendoset dhe për numrin e nën komandën e kujt do të veprojnë trupat shqiptare. Preferenca për autoritetet shkon te bashkëpunimi me një vend aleat në Nato.
Por çfarë është Forca e Stabilizimit?
Mandati i kësaj force përfshin detyra si: stabilizimin e territorit, mbrojtjen e civilëve dhe të operacioneve humanitare, trajnimin e një force policore palestineze të verifikuar, si dhe mbështetjen e zbatimit të planit të paqes për Gazën. Mbetet e paqartë ndërkohë, nëse Forca e Stabilizimit do të ketë detyrë në çarmatosjen e organizatës Hamas.
Në mbledhjen e parë të bordit të paqes, Gjeneral Majori amerikan Jasper Jeffers, që do të jetë komandanti i ISF, dha një përshkrim të përmasave që Forca e Stabilizimit do të ketë në Gaza.
“ISF-ja në fund do të përbëhet nga 20,000 ushtarë që do të punojnë së bashku me 12,000 oficerë të policisë palestineze në Rripin e Gazës. Stërvitja për ISF-në dhe për një forcë policore palestineze do të zhvillohet në Egjipt dhe Jordani. Qeveritë e Indonezisë, Marokut, Kazakistanit, Kosovës dhe Shqipërisë , janë zotuar të kontribuojnë me trupa.” tha Jeffers.
Britanikja ‘The Guardian’ raporton se administrata e Donald Trump, po planifikon të ndërtojë një bazë ushtarake për 5,000 persona atje, që do të shtrihet në një sipërfaqe prej 141 hektare, sipas të dhënave që e përditshmja ka parë. Objekti parashikohet si një bazë operative ushtarake për ISF e planifikuar si një forcë shumëkombëshe e përbërë nga trupa të premtuara./report tv
