Deputetja e PD-së, Manjola Luku, e cila është nga zona e Manzës, përmes një fjalimi plot gafa, deklaroi në Parlament se banorët e atij territori janë shumë të shqetësuar se do të sulmohen nga Irani. Deputetja e PD i kërkoi llogari qeverisë për masat që ka marrë për sulme të mundshme nga Irani, ndoshta duke harruar se Shqipëria është anëtare e NATO-s dhe se hapësira ajërore monitorohet nga vendet anëtare të NATO-s.
Manjola Luku u zgjodh për herë të parë deputete në zgjedhjet e 11 majit 2025, në listën e mbyllur të Partisë Demokratike. Zonja Luku tashmë po ‘shkëlqen’ me fjalime që bëhen menjëherë meme në rrjetet sociale. Sa i takon pasurisë, Luku deklaron disa pasuri të paluajtshme përfshirë 345 m2 ullishte, 300 m2 ullishte, 2010 m2 tokë arë, 1500 m2 tokë arë dhe një vilë me sipërfaqe 284 m2 me vlerë të deklaruar 100 mijë euro. Deputetja e PD-së deklaron edhe një makinë 32 mijë euro dhe disa llogari bankare.
Deputetja Manjola Luku ka prej 19 vitesh edhe një biznes farmaci. Një farmaci në pronësi të saj ndodhet në Manzë, ndërsa një tjetër farmaci rezulton me vendodhje në Gjirin e Lalzit. Një tjetër farmaci rezulton në emrin e bashkëshortit të deputetes së PD-së Manjola Luku, Gazmir Luku, po në Manzë, përmes kompanisë Luku Medical Group, me ortak të vetëm Gazmir Luku.
Të paktën 12 pasuri të paluajtshme deklaron bashkëshorti i deputetes Luku, Gazmir Luku, ku përfshihet një truall plus ndërtesë me sipërfaqe 2350 m2, disa sipërfaqe ullishte dhe sipërfaqe të tjera tokë arë. Gazmir Lulu deklaron gjithashtu disa makina dhe aksione në biznese. Pasuria e tij ka një vlerë qindra mijëra euro.
Manjola Luku ka qenë anëtare e Këshillit Bashkiak Durrës si përfaqësuese e PD-së, ndërsa bashkëshorti Gazmir Luku kryetar i degës së PD-së Manzë.
