SHBA dhe Irani kanë rënë dakord për një armëpushim dyjavor me kusht që të rihapet Ngushtica e Hormuzit. Irani ka konfirmuar se “për një periudhë dyjavore, kalimi i sigurt përmes Ngushticës së Hormuzit do të jetë i mundur”.
Pakistani, i cili ka vepruar si ndërmjetës, i ka ftuar të dyja palët për bisedime në Islamabad të premten, për “zgjidhjen e të gjitha mosmarrëveshjeve.”
Irani ka një plan me 10 pika për armëpushimin, të cilat janë:
Ndërprerje e plotë e luftës në Irak, Liban dhe Jemen
Ndërprerje e plotë dhe e përhershme e luftës kundër Iranit, pa kufi kohor
Përfundimi i të gjitha konflikteve në rajon në tërësinë e tyre
Rihapja e Ngushticës së Hormuzit
Vendosja e një protokolli dhe kushteve për të garantuar lirinë dhe sigurinë e lundrimit në Ngushticën e Hormuzit
Pagesa e plotë e kompensimit për kostot e rindërtimit për Iranin
Angazhim i plotë për heqjen e sanksioneve ndaj Iranit
Lirimi i fondeve iraniane dhe aseteve të ngrira të mbajtura nga Shtetet e Bashkuara
Irani angazhohet plotësisht të mos kërkojë zotërimin e armëve bërthamore
Armëpushimi i menjëhershëm hyn në fuqi në të gjitha frontet sapo të miratohen kushtet e mësipërme.
Kryeministri i Pakistanit, Shehbaz Sharif, i cili ka ndërmjetësuar negociatat, deklaroi hyrjen e menjëhershme në fuqi të armëpushimit.
“Me përulësinë më të madhe, kam kënaqësinë të njoftoj se Republika Islamike e Iranit dhe Shtetet e Bashkuara të Amerikës, së bashku me aleatët e tyre, kanë rënë dakord për një armëpushim të menjëhershëm kudo, përfshirë Libanin dhe vende të tjera, me efekt të menjëhershëm.”
Armëpushimi erdhi pak më shumë se një orë para afatit të Trump për Iranin që të arrinte një marrëveshje, përndryshe “një qytetërim i tërë do të shuhej”.
Çmimet e naftës kanë rënë ndjeshëm që nga njoftimi i armëpushimit dhe tani tregtohen dukshëm nën 100 dollarë për fuçi.
Shumë vende kanë lëshuar deklarata duke mirëpritur armëpushimin e përkohshëm, përfshirë Koreinë e Jugut, Zelandën e Re dhe Irakun, së bashku me reagime nga Australia, Japonia dhe Pakistani.
