Kryeministri Edi Rama dhe ministrja e Ekonomisë dhe Inovacionit, Delina Ibrahimaj, bashkëbiseduan këtë të enjte për rritjen e pagave në sipërmarrjet shqiptare, rritjen ekonomike, punësimin, pagat në çdo sektor dhe folën gjithashtu edhe për sektorin e ndërtimit.
Gjatë fjalës së tij, Rama u shpreh se në mënyrë të papranueshme sektorit të ndërtimit nuk mund t’i hidhet baltë dhe të përfshihet në kornizën e krimit.
Sakaq, kreu i qeverisë theksoi se Shqipëria ka shumë arsye përse mund të bëjë ndërtime dhe shumë njerëz, sipas tij, e kanë të pamundur ta pranojnë suksesin që Shqipëria ka në sektorin e ndërtimit.
“Unë as nuk e vë në diskutim që jo çdo gjë në sektorin e ndërtimit është e pastër. Është e qartë si drita e diellit dhe është e çmuar si djersa e dhjetëra mijëra njerëzve që punojnë për këtë sektor.
Ama që këtë sukses evident të Shqipërisë, këtë transformim të Shqipërisë që sektori i ndërtimit e bën të dukshëm, të prekshëm menjëherë kur dikush vjen në Shqipëri, ta fusin në kornizën e krimit është diçka e neveritshme dhe e papranueshme. Ja ku është njëri nga ata që janë pas këtyre projekteve.
E kanë të vështirë të tjerë që të besojnë se si ka mundësi Shqipëria mund të bëjë ndërtime të tilla, punë e madhe fort se e kanë të vështirë.
Ka shumë arsye pse Shqipëria mund të bëjë ndërtime të tilla dhe janë arsye lehtësisht të lexueshme nga të gjithë ata që duan t’i lexojnë ashtu siç janë.
Është e pamundur që disa ta pranojnë suksesin e Shqipërisë, por ama është e pamundur për ne që shumica e atyre që investojnë në ndërtim të futen në thesin e baltës për disa që mund të jenë patjetër për atë që thuhet, por jo të gjithë ama.
Ka disa fakte të rëndësishme për t’u nënvizuar vetëm nga ky projekt që ende s’ka filluar puna”, u shpreh Rama.
