I përket një klubi të madh, por e ardhmja mbetet mister. Luis Hasa është vërtet lojtar i Napolit, edhe pse i huazuar te Karrareze në Serinë B, veçse në Itali ka komente që kështu siç janë punët sot, ai do ta ketë të vështirë të luajë në stadiumin “Maradona”.
Gazetari Paolo Paganini ka folur për Radion e njohur napolitane, “Radio Kis Kis Napoli”, duke komentuar për situatën me disa nga lojtarët e rinj që janë kaluar në klube të tjerë nga kampionët e Italisë.
Sipas Paganinit, futbollistë si Hasa apo Rao do të vazhdojnë të jenë në huazim nëse Antonio Konte mbetet trajner i Napolit, sepse njeriu i stolit dëshiron lojtarë me përvojë në Serinë A, jo djem të rinj.
E njëjta logjikë vlen për talentin e Bosnjës, Alajbegoviç. Natyrisht, ekziston një mundësi e mirë për sulmuesin 22-vjeçar kuqezi.
Konte ka shumë mundësi të kthehet në drejtimin e kombëtares së Italisë, dhe napolitanët mund të merrnin një teknik me filozofi të ndryshme si Vinçenco Italiano, I cili ka më shumë besim tek talentet e reja.
Vlen të theksojmë se Luis Hasa u rrit si futbollist në Akademinë e Juventusit, pastaj e mori Napoli, ndërsa këtë edicion luan për Kararrezen në Serinë B, për të cilën ka shënuar 5 gola e ka shërbyer 4 asistë, duke qenë një nga më të mirët.
