Zgjerimi i Bashkimit Evropian në Ballkanin Perëndimor është në qendër të diskutimeve në Forumin Ekonomik të Delfit në Greqi, ku po merr pjesë edhe ministri për Evropën dhe Punët e Jashtme, Ferit Hoxha.
Ai ka zhvilluar një takim me ministrin e Jashtëm grek, George Gerapetritis, ku në fokus gjendet riafirmimi i mbështetjes për zgjerimin e BE-së, por edhe forcimi i bashkëpunimit politik mes vendeve të rajonit dhe unionit.
Në një postim në X për takimin me Gerapetritis, ministri i Jashtëm thotë se është riafirmuar angazhimi për bashkëpunimin, fqinjësinë dhe partneritetin, si dhe përfshirja me ekipe të dedikuara për të adresuar çështjet e pazgjidhura.
“Ramë dakord të angazhohemi në mënyrë aktive dhe konkrete në të gjitha nivelet, me ekipe të dedikuara, për të adresuar çështjet e pazgjidhura dhe për të punuar drejt zgjidhjeve të balancuara dhe të qëndrueshme në interes të të dy vendeve tona dhe qytetarëve tanë, duke hapur një kapitull të ri në marrëdhëniet tona dypalëshe”, shkruan Hoxha në X duke veçuar edhe intensifikimin e dialogut politik dhe bashkëpunimin në fushat e energjisë, infrastrukturës dhe turizmit.
Njëkohësisht ai vlerëson edhe mbështetjen e Greqisë për anëtarësimin e Shqipërisë në BE, në prag të presidencës greke.
“Gjithashtu shpreha vlerësimin tonë për mbështetjen e vazhdueshme të Greqisë për anëtarësimin e Shqipërisë në BE dhe për avokimin e saj të vazhdueshëm të zgjerimit në Ballkanin Perëndimor, duke përfshirë edhe mbajtjen e kësaj çështjeje në krye të agjendës së Forumit të Delfit këtë vit. Ne mirëpresim angazhimin e Greqisë për të punuar ngushtë me Presidencat e ardhshme të BE-së të Irlandës dhe Lituanisë për të siguruar që zgjerimi të mbetet një përparësi kyçe evropiane”, shprehet Hoxha.
Gjatë vizitës së tij, ministri Hoxha do të marrë pjesë në disa panele diskutimi kushtuar sfidave dhe prioriteteve rajonale e ndërkombëtare, ku një nga temat kryesore mbetet pikërisht zgjerimi i BE-së në Ballkanin Perëndimor.
Në këto diskutime, së bashku me homologë të rajonit dhe pjesëmarrës të tjerë, Hoxha pritet të theksojë rëndësinë që ka integrimi i Ballkanit Perëndimor për një Evropë më të sigurt dhe më të fortë.
