Kompania kineze Xpeng pritet të nisë dorëzimet e makinave të saj “fluturuese” në vitin 2027, ndërsa prodhimi në shkallë të gjerë do të fillojë që vitin e ardhshëm.
Sipas presidentit të kompanisë, Brian Gu, Xpeng ka marrë tashmë mbi 7 mijë porosi për këto mjete, kryesisht në Kinë, ndërsa po punon për të siguruar miratimin nga autoritetet e aviacionit.
Paralelisht, kompania planifikon të nisë prodhimin e robotëve humanoidë në tremujorin e katërt të vitit 2026, duke i përdorur fillimisht në role si recepsionistë apo në shitje për ndërveprim me klientët.
Gu theksoi gjithashtu potencialin për zgjerimin e bashkëpunimit me prodhuesin gjerman Volkswagen AG, me të cilin Xpeng ka zhvilluar modele elektrike në bashkëpunim.
“Ka shumë fusha ku mund të bashkëpunojmë dhe të krijojmë vlerë të përbashkët”, u shpreh ai, duke shtuar se kompania është e hapur për partneritete të reja në tregje të ndryshme.
Xpeng planifikon gjithashtu testimin e robotaksive në qytetin Guangzhou gjatë këtij viti, ndërsa në 12-18 muajt e ardhshëm synon të prodhojë nga qindra deri në mijëra njësi.
Kompania është në zgjerim ndërkombëtar dhe aktualisht operon në rreth 60 vende jashtë Kinës.
