Borxhi publik në tremujorin e parë të këtij viti preku shifrën më të ulët historike duke rënë në 48.7%. Raporti i fundit i Ministrisë së Financave tregon se ky tregues ka rënë me rreth 4% në raport me vitin 2025, me kontributin kryesor të uljes së borxhit të brendshëm por edhe të atij të jashtëm.
BORXHI PUBLIK NË PËRQINDJE
Viti 2025 52.87%
Janar-Mars 2026 48.79%
Diferenca -4.08%
Përllogaritja e borxhit në përqindje bëhet mbi një Prodhim Kombëtar prej 29 miliardë euro, në rritje krahasuar me vjet, çka ul direkt edhe përqindjen e borxhit në raport me PBB-në.
Ndërsa përkthyer në vlerë, borxhi i Shqipërisë përllogaritet në 14.1 miliardë euro dhe është tkurrur me 464 milionë euro krahasuar me vitin e kaluar.
Viti 2025 14.662 mln euro
Janar-Mars 2026 14.198 mln euro
Diferenca -464 mln euro
Ndryshe nga periudhat e kaluara, ku zhvlerësimi i valutave jepte kontributin kryesor në uljen e borxhit, në këtë tremujor të parë të vitit 2026, kanë ndryshuar ‘rolet’. Rënia më e madhe është regjistruar tek borxhi i marrë brenda vendit, nga 31.38% që ishte në fund të vitit 2025, është ulur në 28.59%, ndërsa borxhi i jashtëm ka rënë nga 21.49% vjet në 20.2%
BORXHI SIPAS MONEDHËS
I brendshëm I jashtëm
Viti 2025 31.38% 21.49%
Janar-Mars 2026 28.59% 20.20%
Diferenca -4.08% -1.29%
Në fakt, borxhi do të ishte edhe më i lartë nëse monedha kombëtare nuk do të ishte forcuar. Zhvlerësimi i valutave dhe kryesisht i euros e ka bërë më të lirë borxhin e huaj, për shkak se këstet e shlyerjes së tij kanë qenë më të ulëta.
Referuar raportit, borxhi publik i Shqipërisë është i përqendruar kryesisht për mbështetje buxhetore, për sektorin e energjisë dhe atë të transportit./Eliza Gjediku
