Prokuroria e Posaçme ka mohuar zyrtarisht raportimet se është ushtruar kontroll në banesën e gazetarit Sokol Balla, duke i cilësuar ato si të pavërteta dhe spekulative.
Pas publikimit të disa lajmeve në portale pranë Sali Berishës, ku pretendohej se ndaj gazetarit Sokol Balla ishte ushtruar kontroll në banesë, ka reaguar zyrtarisht SPAK.
Në një përgjigje për ABC News, zyra e shtypit e Prokurorisë së Posaçme thekson se nuk është ndërmarrë asnjë veprim i tillë.
“Në përgjigje të kërkesës suaj, Prokuroria e Posaçme nuk ka ushtruar kontroll në banesën e shtetasit Sokol Balla”, thuhet në reagimin zyrtar.
Bazuar në këtë deklaratë, rezulton qartë se nuk ka pasur asnjë kontroll apo veprim hetimor ndaj gazetarit, duke hedhur poshtë pretendimet e publikuara më herët.
Kjo nuk është hera e parë që media pranë Sali Berisha akuzohet për publikim informacioni të pavërtetë ndaj Sokol Balla. Sipas burimeve mediatike, raste të ngjashme janë përsëritur edhe më parë, duke ngritur shqetësime për përhapjen e dezinformimit dhe sulmet ndaj gazetarëve.
Ngjarja rikthen në vëmendje debatin mbi përgjegjësinë e mediave për verifikimin e informacionit dhe rolin e institucioneve në garantimin e transparencës dhe të vërtetës publike.
