Mbledhja e datës 30 prill të Këshillit të Lartë të Prokurorisë është shoqëruar me debate të ashpra mes anëtarëve.lidhur me vendimin për hapjen e vendeve vakante.
Në audion zyrtare të regjistruar nga vetë KLP, dëgjohet anëtari i KLP-së, Sokol Stojani, teksa debaton me kryetaren e KLP-së, Mirela Bogdani.
Debati u përqendrua te një vendim për dërgimin në Kuvend të vendeve vakante në KLP, ndërsa kryetarja Bogdani kërkoi që çështja të rikthehej për rishqyrtim.
Kjo kërkesë u kundërshtua nga Stojani, me pretendimin se vendimet e marra nuk mund të zhbëhen.
Nga ana tjetër, Stojani e paralajmëroi Bogdanin se do të mbajë përgjegjësi, ndërkohë që kryetarja e KLP-së këmbënguli se në mbledhjen e 16 prillit nuk do të merrej një vendim, por do të mbahej një tjetër mbledhje. Mbledhja në KLP zgjati më shumë se një orë dhe debatet ishin permanente.
Bogdani: Ore nuk do marrim vendim sot.
Stojani: O kryetare, je në kundërshtim me ligjin. Ti të paktën duhet ta njoftosh anëtarin. Është përdhunim moj kryetare. Të kërkosh ti të diskutosh
Bogdani: Po pse vetëm ju ndiheni i përdhunuar zoti Stojani? Ne të tjerët e kuptoni sesi ndihemi pas këtyre fyerjeve dhe ofendimeve?
Bogdani: Mbledhjen e deklarojmë të mbyllur. Të qetësohen palët, të rehabilitohen dhe të vijnë në mbledhjen tjetër. Mirupafshim!
Stojani: Ju po sabotoni mbledhjen e Këshillit.
Bogdani: Unë po sabotoj?!
Stojani: Duke futur gjëra dhe duke penguar veprimtarinë e këtij Këshilli. Kryetare do të mbani përgjegjësi për këtë.
Bogdani: Do të mbaj!
Stojani: Do mbani përgjegjësi po të them.
Bogdani: Në litar do më varësh, e di..
Stojani: Po ç’litar aman, s’je ti për litar. Ashtu të ngre në qiell. Turp të të vijë njëherë. Keni mbledh gjithë njerëzit këtu për t’i mbajt njerëzit peng për gjëra ordinere.Jo,joo.. A ka gjë më ordinere se të rishikosh një vendim të marrë? S’ka gjë më ordinere se kjo. Ky është problem konceptual
Bogdani: Po është diskutim. Në qoftëse ti…
Stojani: Po s’ke diskutim moj. Po nuk diskutohet një vendim moj. Po nuk diskutohet një vendim i marrë moj, po nuk diskutohet… Moj kryetare…
Bogdani: Ore kështu e gjykova. Kush je ti që më tregon mua?
Stojani; Po kush je ti që vë në diskutim moj?
Bogdani: Po rrëzoje o burrë..
Stojani: Po nuk rrëzohet moj…
Bogdani: Dakord, mbase jam çmendur unë.
Stojani: Po je çmendur moj, je çmendur. Po je çmendur…, po je çmendur moj..
Bogdani: Nuk merrem dot, nuk merrem dot me njerëz me jetë të konsumuar, kaq, kaq
Stojani: Ti nuk mund të zhbësh dot një vendim moj zonjë e dashur, nuk e zhbën dot, nuk e zhbën dot.
Anëtari i KLP-së: Po atë nismën tonë
Bogdani: Po patjetër mo, po ju nuk të lini hapësirë
Stojani: Po jo, se në këtë hapësirë ti do me fut ato muhabetet e tua.
Bogdani: Ore ashtu e gjykova.
Prokurori Sokol Stojani dhe kryetarja e Këshillit, Mirela Bogdani kanë pasur edhe debate të mëparshme me njëri-tjetrin. Në tetor të vitit të kaluar, ata u përfshinë në një debat të ashpër, në lidhje me procedurën e ndjekur për plotësimin e një vendi vakant në Prokurorinë e Sarandës.
