Banka e Shqipërisë ka vendosur më në fund të licencojë bankën bujqësore turke Ziraat, pas disa muajsh nga dhënia e miratimit paraprak.
Sipas njoftimit të Bankës Qendrore, në mbledhjen e datës 6 maj 2026, Këshilli Mbikëqyrës vendosi të miratojë dhënien e licencës për ushtrimin e veprimtarisë bankare dhe financiare degës së bankës së huaj “Ziraat”.
Në gusht 2025 u dha miratimi paraprak nga Banka e Shqipërisë për licencimin e Ziraat.
Në përputhje me dokumentacionin e paraqitur në Bankën e Shqipërisë, është shqyrtuar aplikimi i Ziraat për pajisjen me licencë për ushtrimin e veprimtarisë bankare dhe financiare.
Ajo do të ushtrojë veprimtaritë bankare dhe financiare, në përputhje me kushtet dhe kërkesat e licencës së miratuar nga Banka e Shqipërisë.
“Ziraat Bank” është një bankë tregtare që operon në Republikën e Turqisë prej vitit 1863, me licencë të vlefshme bankare dhe leje operimi nën mbikëqyrjen e Agjencisë së Rregullimit dhe Mbikëqyrjes Bankare. Jashtë territorit të Turqisë, aktiviteti i saj shtrihet edhe në disa shtete të tjera, si: Mbretëria e Bashkuar, Bullgaria, Greqia, Kosova, Qiproja Veriore, etj.
Aktualisht, në vendin tonë operojnë 12 banka, shumica prej tyre me kapital të huaj dhe një pjesë më e vogël me kapital vendas. Njera prej tyre u licencua se fundmi, Jet Bank, banka e pare digjitale ne Shqiperi. Gjatë 2024, Banka Ziraat paraqiti një kërkesë pranë Bankës së Shqipërisë për licencimin e degës së saj të parë në Tiranë. Ziraat do të jetë banka e dytë me kapital turk në Shqipëri.
Një bankë e tillë është e specializuar për huadhënien ndaj bizneseve që operojnë në fushën e bujqësisë, ndaj pritet ta rrisë më tej mbështetjen financiare ndaj këtij sektori.
