Protestat e opozitës po bëhen më të lodhshme dhe pa vlerë. Ky është mendimi i Dashamir Shehit, kreu i Lëvizjes për Zhvillim Kombëtar, i cili i krahasoi protestat e opozitës si organizime fejesash.
Shehi theksoi se brenda PD nuk ka pasur asnjëherë demokraci. Madje, sipas tij, të tilla protesta bëhen edhe për të hequr vëmendjen nga zgjedhjet e 23 majit, të cilat ai i cilëson si të pa vlera.
“Partia Demokratike i ka bërë protestat sikur po bëjnë fejesa, çdo dy javë, presim datën dhe bëjmë festën. I ka kthyer në rutinë. Protestat bëhen për një temë të caktuar, siç ishte ajo në Maqedoninë e Veriut. Protesta është rebelim popullor, ndërsa këto janë organizime partiake. Që të jetë protestë, opozita duhet të aktivizojë qytetarin, jo militantët.
Protesat bëhen një herë, dy herë në vit, si mund të bëhen javë për javë? Unë mendoj se bëhet edhe për këto zgjedhjet në parti, që s’kanë asnjë vlerë. Berisha është i vetëm në garë. Ata duhen të merren me gjëra serioze, si reforma administrative, të merren me ligjin zgjedhor. Prandaj, mendoj që nuk ka shanse që ata të vijnë në pushtet. Brenda PD nuk ka demokraci dhe as nuk ka pasur asnjëherë”, tha Dashamir Shehi.
Shehi gjithashtu nënvizoi se në 23 maj nuk ka garë, pasi fitues dihet që do të jetë Berisha. Këtë gjë ai e cilëson qesharake.
“Aty s’ka garë, do të fitojë Berisha, dhe për mua është një gjë qesharake. Funksioni bazë i opozitës në Shqipëri dhe në botë është të rrëzojë qeverinë që ka përballë, nëse nuk bëjnë atëherë nuk janë për këtë gjë. Berisha le të rrijë atje ku është, ta mbajë PD-në, ne të tjerët duhet të gjejmë shtigje të reja”, përfundoi Shehi.
