Kampionët në fuqi të MLS-së, Inter Miami, fituan 6-4 me përmbysje kundër Philadelphia Union për raundin e 15-të të kampionatit. Ajo që shqetësoi në këtë ndeshje ishte gjendja fizike e Lionel Messit.
Ylli i Inter Miamit ndjeu një shqetësim në kofshën e majtë dhe në minutën e 73-të kërkoi një zëvendësim, duke u drejtuar menjëherë për në dhomat e zhveshjes.
Tifozët, sidomos ata të Argjentinës, kanë frikë për gjendjen e Messit kur jemi 17 ditë nga nisja e Kupës së Botës 2026. Megjithatë, pas ndeshjes trajneri i Inter Miamit, Guillermo Hoyos, u mundua të qetësonte spekulimet për një dëmtim të rëndë.
Duke folur me gazetarët, Hoyos tha: “Për aq sa di unë, ende nuk kemi një raport për këtë, por ai ishte vërtet i lodhur. Po, ishte lodhje. Ai ishte i lodhur, fusha ishte e rëndë dhe në vend që të dyshosh, gjithmonë thua të mos rrezikosh.”
NDESHJA – Philadelphia Union shënoi dy herë brenda dhjetë minutash me dopietën e Iloskit, por Berterame shkurtoi për 1-2. Më pas miqtë shënuan sërish, por këtë herë me Damianin për 1-3.
Në 15 minutat e fundit të fraksionit të parë u shënuan katër gola. Fillimisht Inter Miami përmbysi për 4-3 me dopietën e Suarez dhe golin e dytë të ndeshjes nga Berterame (dy asiste nga Messi). Në shtesën e tetë Ilioski barazoi nga 11 metërshi për 4-4.
Me pjesën e parë që ishte ‘e çmendur’, fraksioni i dytë nisi i kujdesshëm dhe vendasit shënuan dy herë të tjera me Suarez (tripletë) dhe de Paul për rezultatin finale 6-4 dhe tri pikë që i mbajnë në vendin e dytë të renditjes (31 pikë), dy pikë pas Nashville.
