Kryeministri Edi Rama ka publikuar një video në rrjetet sociale për të përkujtuar 26 majin e vitit 1996, një datë që lidhet me zgjedhjet parlamentare të asaj kohe dhe tensionet politike që shoqëruan vendin në periudhën e tranzicionit.
Në videon e shpërndarë, Rama sjell pamje që krahasojnë Shqipërinë e vitit 1996 me Shqipërinë e sotme, duke vënë theksin tek ndryshimet dhe zhvillimet e vendit gjatë afro tre dekadave të fundit.
“Shqipëria e 1996, dhe ku është Shqipëria sot! Dhe me një datë që flet për dy botë, ju uroj një ditë të mbarë!”, shkruan kryeministri krahas videos së publikuar.
26 maji i vitit 1996 konsiderohet një nga datat më të debatueshme të politikës shqiptare pas rënies së komunizmit.
Zgjedhjet parlamentare të asaj kohe u shoqëruan me akuza për manipulim, tensione mes forcave politike dhe protesta të opozitës, duke shënuar një moment të rëndësishëm në historinë e tranzicionit demokratik të Shqipërisë.
Përmes videos, Rama duket se synon të sjellë në vëmendje kontrastin mes Shqipërisë së viteve ’90 dhe realitetit aktual të vendit, ku Shqipëria ka bërë hapa të konsiderueshën në rrugëtimin për anëtarësimin në BE.
