Deputetët e Parlamentit të Shqipërisë gjenerojnë miliona lekë të ardhura nga qeratë. Gazeta prej disa ditësh ka treguar detaje nga pasuria e tyre, ku ka emra me pasuri 2-3 milionë euro, ndërsa ka dhe nga ata që jetojnë vetëm me pagën.
Por në bazë të deklarimeve që 140 deputetë kanë bërë pranë Inspektoratit të Lartë të Deklarimit dhe të Kontrollit të Pasurive, rezulton se 34 emra kanë dhënë objekte me qera. Shumica kanë lëshuar apartamentet me qera dhe marrin mijëra euro fitime.
Ka të tjerë që kanë dhënë zyra e troje. Ajo që bie në sy është se fëmijët e ish-kryeministrit Sali Berisha kanë fitime shumë të larta. Vajza e ish-kryeministrit ka deklaruar se përfiton rreth 24.840 mijë euro në vit nga qeratë. Ajo ka dhënë me qera dy apartamente me 900 euro në muaj njëri dhe 1170 euro në muaj për tjetrin.
Ndërsa djali i Sali Berishës ka deklaruar se nga qeratë ka përfituar 47.956 euro. Pra në total vajza dhe djali i tij kanë përfituar plot 72 mijë euro brenda një viti vetëm nga qeratë. Nëse kalojmë te emrat e tjerë, Edmond Haxhinasto shprehet se ka përfituar të ardhura nga qeraja e apartamentit, 7.200 euro.
Po ashtu edhe bashkëshortja e tij ka dhënë një apartament me qera 7140 euro. Një shifër shumë të lartë ka deklaruar dhe Aldo Bumçi. Ai është shprehur se ka marrë 36,400 euro. Nuk mbeten pas Florion Mima dhe Halim Kosova. Mima ka deklaruar të ardhura të b/shortes nga qeraja e zyrës në emër të vajzës, 10.800 euro.
Ndërsa Kosova ka deklaruar të ardhura nga dhënia me qera e Spitalit Amerikan, 28.900 euro. Luan Baçi ka deklaruar qera nga 3 objekte, me fitime 153.000 lekë, 68.000 lekë dhe 204.000 lekë.
Adnor Shameti në deklaratën pranë ILDKP shprehet se për vitin 2017 ka siguruar të ardhura sipas kontratës së qirasë më 19.04.2017 për njësinë me sip. 124.10 m2, 40 000 lekë/muaj.
Të ardhura sipas kontratës së qirasë më 15.09.2016 për ap. me sip 250 m2 në Tiranë, bodrumin me sip. 21.06 m2 dhe garazhin me sip. 12 m2, 2.000 euro/muaj. Deputeti që ka fituar më shumë nga qeratë është Astrit Veliaj, i cili ka deklaruar 30.078.396 lekë ose rreth 240 mijë euro.
