Thellohen përplasjet mes Presidencës dhe Qeverisë. Edhe pse prej kohësh marrëdhëniet mes institucionit të Presidencës dhe Qeverisë kanë qenë të acaruara, me krijimin e ngërçit në drejtësi ato janë ashpërsuar akoma më shumë. Me mbylljen e fazës së parë të vetingut, ashtu si shumë institucione të drejtësisë edhe Këshilli i Emërimeve në Drejtësi është zhytur në kaos si pasojë e rrëzimit të anëtarëve të saj nga Komisioni i Pavarur i Kualifikimit.
Nga 9 anëtarë që duhet të ketë, KED për momentin ka ngelur me vetëm 4 anëtarë, duke mos marrë kështu dot vendime. Kjo për faktin se 5 anëtarë të këtij organi kanë ngelur në veting, 1 e ka kaluar ndërsa 3 të tjerë nuk kanë hyrë akoma në proces. Por pikërisht kjo gjë ka bërë që marrëdhëniet e acaruara mes presidentit Ilir Meta dhe kreut të Kuvendit Gramoz Ruçi të thellohen akoma më shumë. Kjo për faktin se pak kohë më parë në momentin kur KED kishte mbetur me 6 anëtarë, kreu i Kuvendit Gramoz Ruçi ju drejtua me një letër Metës, ku i kërkonte që ai të hidhte shortin për vendet vakante, ose t’ia jepte këtë të drejtë Parlamentit. Ilir Meta ju përgjigj se KED ka ende mundësi të marrë vendime.
Por me goditjen që KPK i bëri Këshillit të Emërimeve në Drejtësi, ky institucion nuk merr dot asnjë vendim pasi është me 4 anëtarë. Por ndonëse KED është paralizuar, presidenti Meta deri më sot nuk ka ndërmarrë asnjë veprim për të zhbllokuar këtë ngërç. Sipas informacioneve të gazetës, presidenti ka vendosur që vendimin për shortin do e vendosë në shtator. Pikërisht në këtë muaj Meta do të vendosë nëse do e hedhë vetë shortin apo do ia delegojë Kuvendit këtë të drejtë, pasi vijon të jetë i pavendosur. Megjithatë kjo pavendosmëri e presidentit ka futur akoma më shumë në ngërç institucionet e drejtësisë, pasi nëse Meta do të hidhte shortin për anëtarët e rinj të KED do i hapej rruga dhe zhbllokimit të Gjykatës Kushtetuese.
Pasojat
Mosfunksionimi i Këshillit të Emërimeve në Drejtësi ka bërë që të bllokohet edhe puna e Gjykatës Kushtetuese dhe Inspektoriatit të Lartë të Drejtësisë. Kushtetuesja sot është me 1 anëtar për shkak të procesit të vetingut duke mos marrë dot vendime në lidhje me çështje të ndryshme. Zhbllokimi i Kushtetueses, sipas ligjit, mund të bëhet vetëm nga Këshilli i Emërimeve në Drejtësi, që presidenti Meta vijon ta mbajë peng. Sipas ligjit, Kushtetuesja ka në përbërjen e saj 9 anëtarë, nga të cilët, 3 zgjidhen nga Presidenca, 3 nga Gjykata e Lartë dhe 3 nga Kuvendi. Por të tre këto institucione para se të zgjedhin kandidatët duhet më parë që të marrin aprovimin e KED, i cili bën renditjen e kandidatëve.
Pikërisht mosaprovimi i kandidatëve nga ana e KED, i cili vijon të jetë i bllokuar, ka bërë që dhe puna në Gjykatën Kushtetuese të jetë e bllokuar. Por nga ana tjetër ky skenar i bllokimit të punës së Kushtetueses duket se i intereson presidentit Meta. Kjo për faktin se mosfunksionimi i Gjykatës Kushtetuese do të shty për një periudhë të mëvonshme marrëveshjen e detit me Greqinë.
Presidenti Meta ka dhënë prej kohësh sinjale se do të presë Gjykatën Kushtetuese para se të jap aprovimin për nënshkrimin e marrëveshjes. Ndërkohë që nuk po merr vendim për të zhbllokuar KED, i cili më pas do t’i hapet rrugë rifillimit të punës në Gjykatën Kushtetuese./Endri ARIZI
