Presidenti i Republikës, Ilir Meta ka njoftuar hapjen e procesit për kandidatët për Kryetar të Kontrollit të Lartë të Shtetit.
Ndërkohë që Presidenca në njoftimin e saj ka vendosur dhe afatin e paraqitjes së kandidatëve që është nga data 12 tetor deri më 30 tetor 2018.
Por Meta është kujdesur fort që të theksojë se kryetari i ri i KLSH zgjidhet nga Kuvendi me propozim të Presidentit të Republikës. Duke paralajmëruar qartë se propozimi është i tij, por duhet dhe konsensusi i Kuvendit, pasi vendos shumica e cilësuar.
Dhe në këtë situatë politike tepër të acaruar askush nuk e beson se kreu i KLSH mund të zgjidhet brenda afatit të përcaktuar nga Kushtetuta.
Opozita PD-LSI është jashtë Kuvendit dhe ka përmbi një muaj që ka bojkotuar punimet e legjislativit me argumentin se ky institucion dhe vetë shteti është kapur nga mafia.
Një paralajmërim ky se deputetët e opozitës nuk do të kthehen në Kuvend, pasi sipas tyre nuk ka asnjë kuptim të qëndrohet në një sallë me të inkriminuar.
Basha dhe Kryemadhi më se njëherë kanë kërkuar largimin e Ramës nga qeveria, madje duke kërcënuar se me të kryeministër është në dyshim dhe pjesëmarrja në zgjedhjet e përgjithshme për pushtetin vendor, qershorin e ardhshëm.
Pikërisht për shkak të kësaj situate politike është tepër e vështirë që Edi Rama të sigurojë 84 votat që i duhet për të votuar kreun e ri të KLSH, që do të pasojë Bujar Leskajn në këtë detyrë.
Por më parë se emri i ri të hidhet në Kuvend, “pengesa” fillestare për mazhorancën aktuale për kreun e ri të KLSH do të jetë Presidenti Ilir Meta.
Kreu i shtetit i mëshon fort atributit kushtetues se është ai që do të propozojë emrin e ri në krye të këtij institucioni tepër të rëndësishëm.
Deri më tani, ende nuk ka një kompromis mes Ramës dhe Metës për kandidatin për kryetar të KLSH, duke e zhytur dhe këtë institucion kontrollues të parave dhe vetë shtetit, në kaos.
Ilir Meta kërkon që të ketë njeriun e tij në krye të KLSH dhe “tahmanë” madhe për këto poste të rëndësishme Presidenti dhe ish kreu i LSI e ka të njohur botërisht.
Përmes KLSH Meta shmang kontrollet në ministritë dhe institucionet e rëndësishme që ka drejtuar vetë në tetë vite, 4 vite me qeverinë “Berisha” dhe 4 vite me qeverinë “Rama”. Pasi dhe aty ku ka pasur kontrolle të pjesëshme, vjedhjet e LSI kanë rënë menjëherë në sy, pasi kanë qënë sheshit.
Nuk është rastësi që pjesa më e madhe e ish drejtorëve të LSI kanë rënë në burg, duke filluar me Dashamir Xhikën e Rrugëve dhe Artur Zotajn e Burgjeve dhe një sërë drejtorësh të tjerë të rëndësishëm që kanë ushtruar detyrën si përfaqësues të Metës.
Njëherësh Meta përmes këtij institucioni kërkon të mbajë nën kontroll Ramën, duke e vënë nën presion të kontrollit dhe bërjes publike të maskarallëqeve të tij e ministrave të kabinetit qeveritar që drejton.
Por dhe Rama kërkon të njejtën gjë, një njeri në krye të KLSH me “kostum” opozitar por që të ecë nën komandën e kryeministrit.
Ndaj deri më tani janë në ngërç pasi nuk e kanë arritur kompromisin apo pazarin për kreun e KLSH. Duke rrezikuar që ashtu sikurse SHISH që drejtohet nga nëndrejtori i padekretuar Helidon Bendo, ashtu dhe KLSH të drejtohet nga nëndrejtori i komanduar.
Përplasja e Ramës me Metën dhe me opozitën jo vetëm po na lë pa gjyqësor, por dhe pa SHISH e KLSH. Thjeshtë dhe vetëm mosdakordësi për pazarin e radhës./Pamfleti
