Partia Socialiste ka mbledhur grupin parlamentar mëngjesin e së hënës, për të diskutuar financime ruse në lobingun që kjo parti ka bërë në SHBA. Kreu i grupit parlamentara të PS, Taulant Balla zbardh skemën sesi Basha arriti të bëjë foton me presidentin amerikan Donald Trump.
“Një javë e gjysmë para zgjedhjeve të 25 qershorit, Basha e ndërpreu fushatën dhe shkoi në SHBA ku lobuesi Nik Muzin e futi Bashën në një takim për mbledhje fondesh të kandidatit për guvernator në Mill Woki, takim në të cilin merrte pjesë edhe Presidenti Trump, në këtë takim ku përmes një pagesë kontribuese prej 20 mijë dollarësh mund të fitohej një vend VIP dhe një foto me presidentin Trump. Dhe Basha arriti ta kishte këtë foto me presidentin Trump përmes kësaj skeme” tha Balla.
Sipas tij, prokuroria po vonon të hetojë edhe për paratë me të cilën u mbajt e hapur çadra e PD, pranveren e shkuar.
“Jemi të shqetësuar, se ku i ka gjetur PD këto para.Më 18 shkurt 2017, PD bojkoi kuvendin për reformën në drejtësi. Ka dyshime për cadrën e PD. Si u financua kjo çadër që ishte një përpjekje për ta futur vendin në krizë. Në prag të zgjedhjeve në qershorit, u lidhen dy kontrata lobimi në mënyrë që të bënin takime me administratën e Trampit. Ne kemi administruar dokumentacionin. Janë paguar 675 mijë USD nga PD-ja” tha kreu i grupit parlamentar të PS.
