Shtohen faktet se pas tentativave të opozitës për të destabilizuar vendin fshihet ish-kryeministri Sali Berisha dhe Presidenti Ilir Meta. Gazeta e ka deklaruar se Meta dhe Berisha nuk ndahen dot nga skenarët e dhunës, ndërsa së fundmi po jepen sinjale të qarta se kjo dyshe po bën gjithçka për ta çuar Shqipërinë në zgrip.
Alarmin e ka dhënë ditën e djeshme kryeministri Edi Rama, i cili zbuloi një plan diabolik të kurdisur nga ish-kryeministri dhe presidenti, të cilët i akuzoi se synojnë çuarjen e vendit në luftë civile, përmes të burgosurve.
Duke folur nga foltorja e Parlamentit, i pari i qeverisë bëri me dije se disa ditë më parë kanë marrë informacion se liderët e opozitës, Lulzim Basha, Monika Kryemadhi, Sali Berisha dhe Presidenti Ilir Meta kanë kontaktuar me persona të burgosur, duke iu kërkuar që të marrin në dorë luftën civile dhe të jenë në ballë të revolucionit të nisur nga opozita joparlamentare.
Madje, kryeministri i etiketoi ata si katërshen që i është kundërvënë zgjedhjeve dhe sipas tij kanë kërkuar që të burgosurit të marrin në dorë situatën jashtë. Ndërkohë që, për të mbështetur pretendimet e tij, Rama theksoi më tej se pikërisht pas këtij informacioni që kishte, vjen edhe letra e presidentit Ilir Meta drejtuar dy ditë më parë drejtorit të Burgjeve, ku shprehte shqetësimin për situatën.
“Para dy ditësh morëm informacion se njerëz që lehtësisht mund të verifikohen se me këtë janë të lidhur në katërshen, që iu është kundërvënë fuqimisht zgjedhjeve për t’iu kundërvënë Evropës, ashtu siç e shkruan Ismail Kadareja në faqen e që lexova, kanë komunikuar me disa persona në burgje duke i nxitur të marrin në dorë pjesë të tyre të revolucionit imagjinar dhe çuditërisht menjëherë mbas këtij informacioni del letra e Presidentit të shqetësuar për situatën në burgje”, deklaroi ai.
Pra, kjo deklaratë e Ramës tregon qartë që Meta dhe Berisha kanë pasur plan për të shpërthyer burgjet, sikundër ndodhi në vitin e mbrapsht ’97, në mënyrë që ta kenë më të lehtë rrëzimin e qeverisë. Thënë më troç, ish-kryeministri dhe kreu i shtetit kërkojnë të hapin burgjet dhe të burgosurit t’i përdorin si “armë” kundër mazhorancës qeverisëse dhe kryeministrit Edi Rama.
Rama thumbon Metën
Kryeministri Edi Rama shprehu më tej habinë, duke theksuar se nëse situata në burgje do ishte vërtetët shqetësuese, letrën Presidenti Ilir Meta nuk duhet ta dërgonte tek Drejtoria e Burgjeve por tek Ministria e Drejtësisë. Në këtë kontekst, Rama thumboi Metën duke i kujtuar se nuk ka kompetenca që t’iu kërkojë llogari drejtorive, pasi një gjë e tillë, është jashtë kornizës së kreut të shtetit.
“Nëse Presidenti do të ishte realisht i interesuar për situatën në burgje minimalisht nuk duhej të ta publikonte letrën, minimalisht, të cilën e ka dërguar në adresën e gabuar, pavarësisht se ai sot ndihet komandanti suprem në krah e liderit suprem, nuk ka asnjë tagër t’i drejtohet askujt tjetër për informacion përveçse ministrave përkatës. Drejtorët nuk janë nomenklaturë e Presidentit”, u shpreh ai.
Dhuna ndaj KZAZ-ve
Sa i takon sulmeve ndaj KZAZ-ve që kanë nisur nga bashkitë e drejtuara nga Partia Demokratike dhe Lëvizja Socialiste për Integrim, Rama theksoi se është presidenti Meta, ai që po i hedh benzinë zjarrit, me dekretin e tij për anulimin e zgjedhjeve që ngjalli përplasje të forta institucionale.
“Pjesë trishtuese është përdorimi i nëpunësve, i policëve bashkiakë që po humbasin të drejtën që të punojnë për shtetin, janë në shkelje flagrante të ligjeve. Janë në shkelje të ligjeve dhe pse në këtë farsë mund të ndihen të imunizuar nga ligji, jeta vijon edhe pas 30 qershorit. Mbase plani është për të bërë një 2 Prill tjetër sot pasdite, pasi historia ka ndryshuar se asgjë nuk ka ndryshuar në vizion, qasje dhe metodë në kokën e atij që është lideri suprem /Rigels Seliman
