Vendimi i mazhorancës për ta shkarkuar nga detyra ka vënë në alarm Presidentin e Republikës Ilir Meta. Socialistët mblidhen sërish të hënën për të ecur sa më shpejt me proceduat, por një gjë e tillë po shihet me mjaft shqetësim nga presidenti, i cili e ka kuptuar se me shtyrjen e zgjedhjeve firmosi largimin e tij.
Pas seancës që zhvilloi Komisioni i Ligjeve në fillim të javës, u vu në dijeni presidenti, i cili dje i ka kthyer përgjigje kreut të Komisionit të Ligjeve, Ulsi Manja. Përmes një letre, kreu i shtetit ka sulmuar Kuvendin, duke deklaruar se nisja e proceduarve për shkarkimin e tij është një proces i rremë dhe i orientuar politikisht.
Meta tha se vendimi për të shtyrë datën e zgjedhjeve, ishte një akt i cili sipas tij ndërpreu një proces zgjedhor fiktiv. Por shkresa e Metës tregoi se presidenti është në panik. Mazhoranca i ka 94 vota dhe ai e di se do shkarkohet, prandaj po bën gjithçka për të ngjallur konflikt dhe po ashtu për të shpërndarë Parlamentin.
Meta po lëviz çdo gur për të treguar se Parlamenti është ilegjitim dhe dje ka arritur deri te sulmet dhe akuzat e drejtpërdrejta. Por duket qartë se presidenti është trembur, pasi opozitës i vetmi politikan në detyrë që i ka mbetur, është ai dhe nëse shkarkohet, Meta rrezikon të zhduket nga politika.
Por dje ai ka kërcënuar hapur deputetët, duke treguar se po bën ç’është e mundur t’i shpëtojë shkarkimit, duke mos përjashtuar shpërndarjen e Parlamentit dhe dërgimin e çështjes në Strasburg, pasi ka përmendur konventat e të drejtave të njeriut.
Letra
Në letrën e tij Meta e cilëson procesin e shkarkimit të tij si një lëvizje politike dhe të pavlefshme. “Konkretisht ky akt i rëndësishëm i Kreut të Shtetit, i cili ndërpreu një proces zgjedhor fiktiv, të transformuar praktikisht në një proces votimi, pa garë dhe pa alternativa, respekton posaçërisht nenin 3 të Protokollit nr. 1 të Konventës Evropiane të të Drejtave të Njeriut, si dhe detyrimet që Shqipëria ka marrë përsipër me nënshkrimin e Marrëveshjes së Stabilizim Asociimit Shqipëri – BE, me hyrjen në fuqi më 29 gusht 2006.
Referuar këtyre fakteve dhe argumenteve të pakundërshtueshme, Presidenti i Republikës, Vlerëson se e gjithë veprimtaria aktuale parlamentare që përpiqet të godasë veprimtarinë e Presidentit te Republikës, por pa mundur të rrëzojë përmbajtjen e dekretit të Tij, është një proces i rreme, 1 pambështetur në argumente kushtetues, por vetëm i orientuar verbërisht politikisht”, tha Meta.
Kreu i shtetit deklaroi se shkarkimi i tij nuk i shërben aspak zgjidhjes së krizës politike në vend, duke shtuar se ky veprim është një përpjekje e shfrenuar për të thelluar më tej ndasitë mes palëve.
“Ky proces i rremë dhe verbërisht politik nuk i shërben aspak zgjidhjes së krizës të thelle ne te cilën ndodhet vendi, por përkundrazi e rëndon më tepër atë, si një përpjekje e shfrenuar për të thelluar ndasitë midis palëve dhe për të asgjësuar çdo mundësi për krijimin e klimës së dialogut e bashkëpunimit që Presidenti i Republikës, prej kohësh po i kërkon palëve”, tha Meta.
Kërcënimet e Metës
Presidenti Ilir Meta ka kërcënuar mazhorancën, se në tavolinën e tij ka ende gurë shahu pa lëvizur. Sipas tij, ai është në detyrë dhe mund të ndërmarrë të gjitha vendimet e rëndësishme. Meta deklaroi se Komisioni i Ligjeve nuk është njohur si duhet dekretin e tij për anulimin e datës së zgjedhjeve.
“Presidenti i Republikës garanton Kuvendin e Shqipërisë se është në detyrë, i gatshëm që me përgjegjësi të plotë të ndërmarrë të gjitha vendimet e rëndësishme që do të diktojë situata dhe interesi më i mirë i vendit, në përputhje me kompetencat që i jep Kushtetuta dhe me betimin e tij solemn për t’i shërbyer interesit të përgjithshëm dhe përparimit të të gjithë Popullit Shqiptar!
Së fundmi, në vijim të shkresës suaj nr. 2502/3 prot, datë 19.06.2019, Presidenti i Republikës konstaton se Komisioni i Çështjeve Ligjore, Administratës Publike dhe të Drejtave të Njeriut, në Kuvendin e Shqipërisë nuk është njohur me arsyet e dekretit nr.11199, datë 10.06.2019 “Për shfuqizimin e dekretit nr. 10928, datë 05.11.2018 “Për caktimin e datës së zgjedhjeve për organet e qeverisjes vendore më datë 30 qershor 2019″ dhe për këtë arsye për një gjykim të shëndoshë (në se kjo do t’ju lejohet), po jua përcjellim bashkëlidhur”, tha Meta./ Elisjeda Kiko
