Konfirmohen zërat se shërbimet e huaja po tentojnë destabilizimin e vendit. Ekspertë të ndryshëm ndërkombëtarë prej vitesh janë shprehur se Rusia, Kina apo Irani ka kthyer sytë nga Ballkani. Por një gjë e tillë është konfirmuar dhe nga Shërbimi Informativ Shqiptar. Ky institucion ka ndryshuar faqen e tij online dhe ka përditësuar të dhënat, duke dhënë informacion mbi rrezikun që vjen nga jashtë dhe terrorizmi.
Aty theksohet se shërbime të huaja që nuk na duan të mirën, po tentojnë të bllokojnë integrimin e vendit. SHISH po ashtu ka treguar dhe metodat që po përdorin. “SHISH-i vlerëson se, një aktiviteti i shërbimeve informative jomike është i vijueshëm, i qëndrueshëm në kohë, me prirje rritjeje dhe me ndërthurje të metodave klasike me ato hibride. Interes i tyre mbetet sigurimi i informacioneve mbi zhvillimet e brendshme dhe të jashtme, në raport me proceset integruese euroatlantike, me dinamikën në marrëdhëniet dypalëshe apo rajonale, informacioni konfidencial dhe i klasifikuar, etj. Ato synojnë të pengojnë përpjekjet për integrimin euroatlantik, të dëmtojnë kohezionin mes aleatëve dhe të rrisin ndjeshmërinë e një audience specifike në përputhje me synimet për paraqitjen e aleancës euroatlantike si një faktor kërcënues ushtarak. Vërehen prirje për grumbullim informacioni të klasifikuar, aktivitete influencuese, përdorim të hapësirës kibernetike, propagandës online, dezinformim, në favor të synimeve të tyre strategjike”, thuhet në dokument. SHISH është treguar i kujdesshëm, duke mos thënë për cilat shërbime bëhet fjalë. Zyrtarë të ndryshëm në vend kanë folur për influencë ruse e iraniane. Ndërkohë pak muaj më parë në Komisionin e Sigurisë raportoi kreu i SHISH, Elvis Bendo, i cili tha se ka influencë ruse. Po ashtu u paralajmëruar se SHISH do publikojë shumë shpejt informacione. “SHISH-i punon në mënyrë të vazhdueshme për t’i monitoruar veprimtaritë e tilla, duke përdorur metodat e punës së kundërzbulimit, nëpërmjet verifikimit dhe rritjes së ndërgjegjësimit të individëve dhe zyrtarëve që kanë qasje ndaj informacionit të klasifikuar”, thuhet më tej në raport.
Terrorizmi
Në të dhënat e publikuara nga SHISH janë dhënë informacione dhe për terrorizmin. Aty deklarohet se janë marrë masa për të ndaluar rekrutimin e “ushtarëve” nga ISIS. “SHISH-i bashkëpunon ngushtë me institucionet shtetërore, agjencitë ligjzbatuese dhe shërbimet partnere, në kuadër të monitorimit dhe parandalimit të veprimtarive terroriste brenda dhe jashtë vendit. SHISH-i është i fokusuar edhe në monitorimin e përpjekjeve për indoktrinim, radikalizim e rekrutim të shtetasve shqiptarë në këto organizata. Pas trysnisë ushtarake, humbjes së Kalifatit të vetëshpallur fizik, reduktimit të financave dhe burimeve njerëzore, ISIS/DAESH ka filluar tashmë zbatimin e strategjisë së shndërrimit në një lëvizje klandestine, e cila vijon të përbëjë kërcënim për sigurinë ndërkombëtare. SHISH-i vlerëson se kthime masive të luftëtarëve të huaj terroristë (LHT) nuk janë të pritshme në terma afatshkurtër. Një pjesë e tyre, mund të tentojë të kthehet në vendet e origjinës ose në vende të treta, nëpërmjet rrjeteve të trafikut njerëzor dhe krimit të organizuar. Më gjasë, organizata do të tentojë të ringrihet në rajone me vakum sigurie”, thuhet në raport. Sipas të dhënave të Shërbimit Informativ, ISIS/DAESH dhe Al-Kaeda e kanë shënjestruar në vijimësi rajonin nëpërmjet propagandës, thirrjeve e nxitjeve për akte terroriste. Në raport theksohet se aktualisht, gjendja paraqitet e përmirësuar, vendet e rajonit kanë përforcuar masat kundër terrorizmit, kanë vënë në zbatim strategji efektive e reforma ligjore në luftën kundër terrorizmit si dhe kanë forcuar bashkëpunimin rajonal e ndërkombëtar.
Kliti Topalli
