Zgjedhja e kryeprokurorit të ri është çështje ditësh. Kandidati për Prokuror të Përgjithshëm, Olsian Çela ka dalë ditën e djeshme përpara organeve të vetingut, ku është vlerësuar për të tre kriteret. Ndërkohë që, ndryshe nga kolegët e tij nuk ka qenë i shoqëruar me avokat në seancën dëgjimore. Komisioni i Pavarur i Kualifikimit është shprehur se Çela nuk ka pasuri të fshehur.
Nga verifikimet ka rezultuar se kandidati për Prokuror të Përgjithshëm ka blerë një apartament 77 m2 në “Don Bosko”, në 2015. Një pjesë e parave janë siguruar nga shitja e një apartamentit, ndërsa pjesa tjetër janë kursime nga paga dhe marrja e një kredie në një bankë të nivelit të dytë. Kështu që, nisur nga provat dhe hetimet, KPK ka dalë në përfundimin se nuk janë konstatuar parregullsi dhe se ka burime të mjaftueshme financiare. Gjithashtu Komisioni është shprehur se sipas ILDKPI Çela ka bërë deklarim të saktë dhe ka burime të mjaftueshme financiare. Ai nuk ka fshehur pasurinë dhe nuk është në situatën e konfliktit te interesit.
Çela del i pastër në anën profesionale dhe figurën
Sa i takon pastërtisë së figurës, Komisioni i Pavarur i Kualifikimit theksoi se DSIK-ja është shprehur se për Olsian Çelën nuk ka prova, dyshime dhe të dhëna se ai mund të ketë njohje apo lidhje me persona të krimit të organizuar. Ndërsa sa i takon kriterit të tretë që është ai për anën profesionale, KPK deklaroi se referuar raportit të Prokurorisë së Përgjithshme Çela është me aftësi shumë të mira profesionale, në drejtim dhe menaxhim. Por me daljen e zotit Çela përpara Komisionit të Pavarur të Kualifikimit, procesi i përzgjedhjes së kryeprokurorit të ri që do të pasojë në detyrë zonjë Arta Marku duket se po ecën në ritmet e duhura. Këshilli i Lartë i Prokurorisë ishte shprehur se procesi i përzgjedhjes së emrit të ri të kryeprokurorit kishte mbetur peng i procesit të vetingut. Ndërkohë që, tanimë këto pengesa janë eliminuar. Kjo për faktin se prokurori pranë Prokurorisë së Shkallës së Parë për Krime të Rënda, Olsian Çela, i cili është një nga rivalët e Arta Markut, jo vetëm që ka dalë para organeve të vetingut por ka rezultuar edhe i pastër. Pra, referuar zhvillimeve duket se shumë shpejt do të kemi edhe emrin e ri të kryeprokurorit të ri të Republikës së Shqipërisë, i cili është në dorë të Këshillit të Lartë të Prokurorisë. Ky organ rendit 3 nga 4 kandidatë që janë në garë si kundër janë Olsian Çela, Arta Marku, Fatjona Memçaj dhe Lulzim Alushi dhe ia propozon Kuvendit për votim. Në rast se Parlamenti dështon që ta votojë, sipas ligjit, prokuror zgjidhet nga KPK ai që është i pari në listë. Kujtojmë që, deri më tani para vetingut kanë dalë vetëm Olsian Çela, Arta Marku dhe Fatjona Memçaj, ndërsa Lulzim Alushi pritet të dalë në ditët në vijim.
Konfirmohet në detyrë kryeprokurori i Krujës
Komisioni i Pavarur i Kualifikimit ka konfirmuar dje në detyrë drejtuesin e Prokurorisë së Krujës, Petrit Çano. Pas vlerësimit të bërë nga KPK, rezultoi se prokurori Çano i kalon tre kriteret për vetingun. Në seancën dëgjimore Çano është vlerësuar pozitivisht për pasurinë. Gjithashtu, Komisioni i Pavarur i Kualifikimit deklaroi se kryeprokurori i Krujës është vlerësuar pozitivisht edhe sa i takon pastërtisë së figurës. Sipas raportit të KPK, drejtoria e Sigurimit të Informacioneve të Klasifikuara nuk ka gjetur kontakte të drejtuesit të Prokurorisë së Krujës me persona me lidhje me krimin e organizuar, duke rekomanduar përshtatshmërinë e tij për vazhdimin e detyrës. Ndërkohë që, për profesionalizmin, Çano është vlerësuar shumë mirë nga Prokuroria e Përgjithshme.
Rigels Seliman
