Kryeministri Edi Rama ia ka bërë të qartë dje Presidentit Ilir Meta se nuk do të ketë pazar në kurriz të reformës në drejtësi. Presidenti Meta prej ditësh ka nisur një sulm frontal ndaj reformës në drejtësi, ndërsa në kampin socialist flitet se e gjitha kjo bëhet pasi kërkohet një marrëveshje. Meta është ndër të parët politikanë që rrezikohet nga reforma në drejtësi.
Ndërkohë që, kryeministri Rama ka ripërsëritur edhe një herë dje se nuk do të ketë asnjë pakt për të shpëtuar këdo qoftë nga ndëshkimi i drejtësisë së re që po vjen, madje dhe Metën. Duke folur në Asamblenë e Partisë Socialiste, i pari i qeverisë u shpreh qartë se nuk do të ulet në asnjë tryezë për të negociuar Reformën në Drejtësi. “Reforma në drejtësi, as nuk negociohet, as nuk diskutohet, vetëm mbështetet dhe duhet të jetë shumë e qartë që unë personalisht e di që ka shkolla të ndryshme mendimi në lidershipin e Partisë Socialiste, nuk kam disponim minimal për asnjë lloj marrëveshjeje politike për të ndenjurat e politikanëve dhe për asnjë lloj marrëveshjeje politike që rrezikon ose mund të rrezikojë potencialisht, të pengojë drejtësinë të merret me këdo që mund të jetë subjekt i drejtësisë, qoftë djathtas, qoftë majtas, qoftë në mes, qoftë lartë, qoftë poshtë, qoftë këtu brenda, qoftë jashtë kësaj salle”, deklaroi ai. Duke iu drejtuar opozitës, kryeministri Edi Rama u shpreh se dora e tij mbetet e shtrirë për të biseduar, ndërsa paralajmëroi letra të tjera në drejtim të Lulzim Bashës, duke lënë të hapur mundësinë e një marrëveshje politike. “Patjetër që ne duam paqe politike por një paqe politike për Shqipërinë që duhet të nisë me Shqipërinë, jo me karriget e duhet të bitiset për Shqipërinë, jo për karriget kështu që dora ime mbetet e shtrirë, gati për të shkruar prapë kur të vijë momenti.
Reforma zgjedhore sipas rekomandimeve të OSBE / ODIHR dhe porosisë së Këshillit Europian mbetet një sfidë e përbashkët, patjetër, me opozitën parlamentare dhe me opozitën jo parlamentare e cila ka dhe një vend të lirë bosh që e pret në komisionin e reformës, është e mirëpritur të ulet madje ka dhe veto. Ky është ndryshimi midis nesh dhe tyre. Ata me molotov, ne u japim edhe veton që të na vënë veton ne dhe jemi shumë krenarë që ndryshojmë në këtë pikë”: Shqipëria nuk u rrëzua falë SHBA Kryeministri Edi Rama komentoi më tej edhe zgjedhjet e 30 qershorit dhe bojkotin e opozitës. Gjatë fjalës së tij para Asamblesë së PS, Rama akuzoi opozitën joparlamentare se tentoi të bllokonte procesin, por sipas tij, u frenua pas paralajmërimit të fortë nga Shtetet e Bashkuara të Amerikës dhe Bashkimit Europian. “Do ta nis nga 30 qershori si fundi i një akti të radhës në historinë e politikës së përçarjes, një akti frymëzuar dhe organizuar për të marrë peng Shqipërinë në kuptimin më të plotë të fjalës, duke marrë peng zgjedhjet dhe përmes zgjedhjeve reformën në drejtësi. Në 30 qershor fitoi shteti, fitoi qytetaria, fitoi shpresa, humbi antishteti, humbi rrëmuja humbi dhe balta. Është me vend këtu ta përsëris se Shqipëria u shfaq në të gjithë brishtësinë e saj dhe u kërcënua, u godit, u lëkund, por, nëse nuk u rrëzua, kjo patjetër që erdhi edhe falë qëndrimit të SHBA dhe BE në krah të shqiptarëve, në mbrojtje të parimeve më themelore të demokracisë, në mbështetje të lirisë së zgjedhjeve dhe të së drejtës së çdo qytetari për të zgjedhur. Kështu që, mendoj se nuk do të harrohet roli i aleatëve tanë për të cilët nuk do të jetë kurrë mjaft falënderimi për gjithçka bën”, nënvizoi Rama. /Rigels Seliman
