Deputeti i ri i PD paralajmëroi se do t’u drejtojë kërkesë të gjitha institucioneve për informacion se si ka ndryshuar pasuria e deklaruar dhe e padeklaruar e kreut të shtetit nga viti 1990.
Mësohet se do kërkojë verifikimin e vilës në Gjirin e Lalzit, pallateve në Tiranë, kompanisë së mermerit, inerteve dhe guroreve nga Mali i Tomorrit e deri në Dajt e Krujë, kompanitë e kromit, resortet turistike, për të verifikuar se pas tyre fshihet Meta.
Nëse jep rezultat, nisma do shtrihet dhe në hetimin e pasurisë së të gjithë politikanëve në Shqipëri. Kjo është dhe ajo që presin partnerët tanë SHBA-BE dhe s’përjashtohet mundësia që pjesën më të madhe të informacionit t’ia japin vetë deputetit të PD
Ilir Meta është nën hetim parlamentar për shkeljet që i ka bërë Kushtetutës si President i Republikës, përmes dy dekreteve për anulimin e 30 qershorit dhe caktimin e 13 tetorit si datë të re të zgjedhjeve për pushtetin vendor.
Hetimi për tre muaj siç është përcaktuar dhe në draftin përfundimtar të funksionimit të komisionit të posaçëm parlamentar, ka dy anët e tij të medaljes.
Nëse nga mazhoranca dhe Edi Rama ky afat kohor ofron mundësinë e pushimeve të qeta të verës por dhe një shans për Ilir Metën për të “reflektuar” përpara se të merret vendimi për shkarkimin e tij nga posti i Presidentit, opozita e re ka plane të tjera më konkrete.
Deputetët e rinj të PD janë të mendimit që, meqënëse komisioni i hetimit për Metën tashmë është ngritur dhe ka një afat tre mujor për të realizuar qëllimin e tij, duhet të bëhet një hetim paralel dhe për pasurinë e Presidentit e familjes së tij, ndryshime këto që përfshijnë 29 vite politikë.
Kështu, deputeti i ri i PD Halit Valteri i njohur për kritikat ndaj presidentit Ilir Meta dhe një kundërshtar i paepur të koalicionit të demokratëve me LSI-në, ka shkuar më tej, teksa ka deklaruar se do t’u drejtojë një kërkesë të gjitha institucioneve për informacion si ka ndryshuar pasuria e kreut të shtetit nga viti 1990.
“Ilir Meta e ka humbur të drejtën që të jetë Presidenti i shqiptarëve, pasi bashkë me bashkëshorten drejton opozitën.
Ka një krizë personale, të politikanëve, që për ego personale e kanë futur vendin në një çark. Presidenti ka shkelur Kushtetutën, do i analizojmë faktet dhe do ia çojmë Kushtetueses.
Që të hënën do i drejtoj një letër çdo institucioni, për të evidentuar përmes dokumenteve dhe provave se si ka ndryshuar pasuria e Ilir Metës dhe familjes së tij që nga viti 1990.
Do të bëj kërkesë, pasi jam deputet, jam anëtar i Komisionit të posaçëm parlamentar të hetimit të Presidentit dhe e kam të drejtë ligjore.
Të gjitha rezultatet e këtij hetimi, do t’ua pasqyroj me fakte dhe shifra shqiptarëve. Kush janë pasuritë e deklaruara dhe të padeklaruara, se shqiptarët i dinë.
Vota ime është pro shkarkimit të presidentit. Do të bashkoj votat me shumicën cdo herë që është në të mirë të shqiptarëve”, ka deklaruar deputeti i PD.
Teksa nënvizon se përpos pasurive të deklaruara do të njohë shqiptarët dhe me pasuritë e padeklaruara të Metës, deputeti i PD mësohet se do të kërkojë dhe verifikimin e vilës në Gjirin e Lalzit, pallateve në Tiranë, kompanisë së mermerit, inerteve dhe guroreve nga Mali i Tomorrit e deri në Dajt e Krujë.
Njëherësh, bëhet me dije se Valteri në këtë nismë do të kërkojë ndihmën e institucioneve për të hetuar dhe kompanitë e kromit, resortet turistike në tërë vijën bregdetare, të paktën në Shqipëri, për të verifikuar se pas tyre fshihet Ilir Meta.
Një nismë e tillë është e para e këtij lloji e ndërmarrë në Shqipëri, dhe nëse jep rezultatin e pritshëm, të shtrihet dhe për hetimin e pasurisë së të gjithë politikanëve, që në këto 29 vite kanë pasur pushtet dhe janë akuzuar për abuzime.
Në fakt kjo është dhe ajo që presin partnerët tanë, SHBA dhe BE, dhe nuk përjashtohet mundësia që pjesën më të madhe të informacionit t’ia japin vetë deputetit të PD, për ta përfshirë në dosjen e madhe të hetimit të pasurisë së Ilir Metës.
Ngushtimi i “lakut” rreth qafës ka qënë shkaku me sa duket i rrëshqitjes së Ilir Metës në veprime të pamatura dhe daljes së tij nga “binarët” tërë këto kohët e fundit./Pamfleti
