Mësohen disa nga vendimet që janë marrë në mbledhjen e Kryesisë së PS, e cila zgjati rreth 1 orë dhe u drejtua nga kryeministra Edi Rama. Ndër vendimet e mara nga kryesia është zyrtarizmi i datës 7 shtator për mbledhjen e Asamblesë Kombëtare të PS si dhe miratimi i grupit strategjik për zgjedhjet lokale, i drejtuar nga Blerina Gjylameti dhe e përbërë nga anëtarët Damian Gjiknuri, Ditmir Bushati, Bledi Çuçi, Taulant Balla, Erion Veliaj, Gramoz Ruçi.
Burime nga takimi bëjnë me dije se në mbledhjen e Kryesisë nuk ka pasur diskutime për ndryshime në kabinetin qeveritar dhe me shumë gjasa nuk do ketë as në mbledhjen e Asamblesë Kombëtare të premten. Mësohet se fokusi i PS mbetet përgatitja për zgjedhjet lokale.
Gjatë fjalës së tij pas mbledhjes së Kryesisë, kreu i grupit të PS, Taulant Balla konfirmoi për mediat se fokusi i PS mbeten zgjedhjet vendore.
“PS mblodhi kryesinë e cila diskutoi dhe pastaj miratoi çështjet për të cilat të premten do të thirret Asambleja Kombëtare, e cila do të jetë terësisht e fokusuar në një raport të llogaridhënies. Është shumë e rëndësishme që krah përfundimit të procesit të llogaridhënies të fillojmë prej sot një fushatë kombëtare të anëtarësimeve të reja në PS me qëllim që të bëjmë një organizim më të mirë strukturor dhe elektoral në përgatitje të zgjedhjeve vendore. Përkrah kësaj do të jemi të fokusuar në një proces më të hollësishëm komunikimi dhe dëgjesash ku përfaqësuesit vendorë të PS në nivel kryetarë bashkish apo anëtarë këshillash bashkiakë”- tha Balla./BW
