Aktorja Mimoza Marjanaku ishte përlotur në studion e emisionit “Rudina”, ndërsa pati shprehur dhimbjen për humbjen e artistit të merituar Guljelm Radoja.
Gati me gjysmë zëri ajo ka rrëfyer se si ishte gjendja e aktorit para se ai të ndahej nga jeta për shkak të Covid-19.
Marjanaku, e cila ishte edhe fqinje me Radojën në Durrës, tregon se ai e kaloi njëherë një gjendje të rëndë dhe familjarët shpresonin që ai do ia dilte sërish.
“Kishte një muaj që ishte ekzaminuar me Covid-19. Pothuajse një muaj i shtruar në spital në Durrës. Unë isha dhe fqinje me Guljelmin dhe merrja gjithmonë informacion dhe me sa di unë e ka kaluar edhe njëherë gjendjen që kaloi….
Menduam që do ia hidhte sepse atëhere ia hodhi.
Dy ditë para se të intubohej komunikova me gruan e tij dhe më tha që është stabilizuar.
Pastaj marr vesh që intubohet në Durrës dhe pastaj në atë gjendje u transferua në Tiranë. Kam besuar fort që do ia dilte duke e parë profesorin si njeri djaloshar, i bukur, me nur, i veshur si një djalë i ri.
E imagjinoj gjithë kohës me biçikletë duke bërë xhiro në Durrës”, u shpreh kohë më parë mes lotësh aktorja e njohur, Mimoza Marjanaku.
