Hetuesit e Byrosë Kombëtare të Hetimit do i nënshtrohen një procesi rigoroz trajnimi nga amerikanët. Këtë javë ata marrin detyrën, por për rreth 4 muaj ata do të jenë në patronazhin e ekspertëve amerikanë.
Ka qenë Departamenti i Drejtësisë, ai i cili përmes një njoftimi ka bërë të ditur se 28 hetuesit e rinj për 16 javë do të trajnohen nga FBI dhe ekspertë të tjerë amerikanë. “Byroja e Hetimit e ngritur sipas modelit të FBI, pritet të bëhet një njësi elitare që punon pranë Prokurorisë së Posaçme Antikorrupsion (SPAK), me në fokus krimin e organizuar dhe korrupsionin.
Ky organ do të jetë një element kyç për çuarjen përpara të reformës në drejtësi në Shqipëri, si një kusht i Bashkimit Europian në rrugën e integrimit”, thuhet në reagimin e Departamentit të Drejtësisë. Më tej jepen detaje nga procesi 16 mujor i trajnimit, ku një muaj do të jenë agjentët e FBI ata të cilët do iu mësojnë hetuesve teknikat e hetimit. “ICITAP projektoi dhe mbështeti direkt procesin e përzgjedhjes së hetuesve dhe do të drejtojë trajnimin 16-javor të tyre.
Ky trajnim do të përfshijë, një trajnim 4-javor të siguruar nga FBI bashkë me Divizionin Ndërkombëtar të Operacioneve të FBI-së dhe Divizionin e Trajnimit / Quantico. Përafërsisht 600 aplikantë për hetues iu nënshtruan një procesi rigoroz përzgjedhjeje, të përbërë nga teste të aftësisë fizike, provime me gojë dhe me shkrim, verifikime të pasurive dhe kontrolle të integritetit, duke përfshirë poligrafinë. Në fund vetëm 28 u përzgjodhën nga një komision me prokurorë dhe gjykatës, për të vijuar më tej me trajnimin. Në Shqipëri, ICITAP punon me mbështetjen dhe në koordinim me Byronë e Departamentit të Shtetit për Narkotikët Ndërkombëtare dhe Çështjet e Zbatimit të Ligjit”, thuhet më tej.
Detajet e trajnimit
Nëse futemi te faqja zyrtare në internet e akademisë së FBI në Virxhinia, tregohen detaje se si bëhen trajnime të zyrtarëve të ndryshëm nga shtetet partnere, përfshirë dhe Shqipërinë.
“Temat e zgjedhura për programin e trajnimit për drejtuesit vendorë dhe ndërkombëtarë të zbatimit të ligjit përfshijnë: tendencat e politikës, ekonomisë dhe faktorëve socialë kombëtarë e ndërkombëtarë që ndikojnë në funksionimin e policisë; etika dhe integriteti; rekrutimet në punë, ryshfeti dhe politikat promovuese; marrëdhëniet me median; marrëdhëniet e punës; financimi i operacioneve policore; trajnime për çështjet ligjore dhe ndikimi i veprimtarisë kriminale në polici”, thuhet në dokument.
Ekspertët e FBI amerikane do të synojnë t’i përgatisin hetuesit tanë të BKH që një vëmendje të veçantë t’i kushtojnë edhe korrupsionit. Përmes programeve të trajnimit, anëtarët e Byrosë Kombëtare të Hetimit do të mësojnë sesi të bien në gjurmët e parave të korrupsionit dhe ta luftojnë këtë fenomen në tërësi. Trajnime do të ketë edhe për përgjimet, por edhe për të shmangur krimin kibernetik. Për të gjitha këto, do të mbahen orë të specializuara.
Qëndrimi i ambasadores
Për amerikanët SPAK dhe BKH janë kyçe për luftën antikorrupsion. Pak kohë më parë ishte ambasadorja amerikane Yuri Kim që tregoi se si u rrëzua një puç kundër shefes së BKH. “Unë besoj tek SPAK. Taksapaguesit amerikanë besojnë tek SPAK. Kemi investuar sasi të stërmëdha kontributesh për t’u siguruar që SPAK të ngrihet dhe të funksionojë. Ka njerëz që do të jenë gjithmonë pesimistë për këtë projekt.
Pesimizmi është i lehtë, por unë shoh faktet dhe ajo që shoh është që kemi gjëra – si Byroja Kombëtare e Hetimit – e cila nuk ekzistonte dhe tani ekziston. Pati një përpjekje për të mos e lejuar Drejtoreshën të merrte rolin e saj. E kapërcyem këtë. Kishim pak njerëz që aplikuan për vendet e hetuesve; në fakt, në fund, aplikuan më shumë se 600 persona për 60 vende. Ndaj, ka përparim. Këta njerëz tani po testohen. Dua që njerëzit të mos heqin dorë nga shpresa”, tha ajo pak javë më parë.
