Gazetari Berat Buzhala në një lidhje të drejtpërdrejtë për emisionin “Opinion” ka treguar se dje është takuar me ish-presidentin e Kosovës, Hashim Thaçi në Hagë.
Buzhala u shpreh se ndaj grupit të UÇK-së po bëhen shumë padrejtësi ndërsa theksoi se Hashim Thaçi ndodhej në gjendje shumë të mirë.
Berat Buzhala tregoi edhe një detaj për Thaçin. Gazetari bëri me dije se nga analizat shëndetësore që i janë kryer, Hashim Thaçi ka rezultuar si të ishte 13 vite më i ri.
Sakaq, Berat Buzhala tha se do të marrë pjesë në protestën e Tiranës në mbështetje të krerëve të UÇK-së të cilët ndodhen në hagë dhe akuzohen për krime lufte.
“Isha para dy orësh në Hagë. Do kthehem në Shqipëri për të marrë pjesë në protestën në mbështetje të ish-krerëve të UÇK. Takova Hashim Thaçin.
Hashim Thaçi më tha se kur i bënë analizat shëndetësore, gjendjen e ka si të ishte 13 vite më i ri. Mungesa e konsumit të alkoolit dhe cigares ndikojnë. Dieta, ushqimi që ha në mbrëmje, ushtrimet që bën, leximi dhe shkrimi i kanë bërë mirë.
Nëse ka drejtësi diku, është bërë shumë padrejtësi ndaj tij dhe grupit, nëse ekziston në grimcë drejtësi, nuk ka asnjë fakt që implikon grupin. Ka dështuar Prokuroria në Hagë për Haradinajn, Limajn. UÇK s’ka qenë një bandë.
Sa i përket protestës, qindra autobusë do vijnë nga Prishtina dhe Maqedonia e Veriut. Do të vij në Tiranë pasi të kthehem nga Gjermania për të marrë pjesë në protestë”-tha Buzhala.
