Hetimi i prokurorisë së Tiraëns për audiopërgjimin, mes Denar Bibës dhe gjyqtarit Ledi Bianku, mund të rezultojë një flluskë sapuni.
Burime nga akuza konfirmojnë për Tv Klan, se në dispozicion të prokurorisë është venë vetëm materiali i publikuar në exit.al dhe nuk është mundur të bëhet biseda e plotë.
Në bisedën e bërë publike hetuesit thonë, se ka ndërhyrje. Pjesë komunikimi janë hequr apo afruar nga njëra-tjetrën.
Ky fakt sipas tyre ngre dyshime se ndërhyrjet mund të jenë bërë për ta nxjerrë bisedën jashtë kontekstit. Por, për të verifikuar qëllimin e bisedës, hetuesit thonë se duhet të ekzaminojnë të gjithë bashkëbisedimin mes tyre.
Është e paqartë, se cili do të jetë hapi tjetër i prokurorisë për këtë rast, pasi audio e plotë duket e pamundur për tu gjetur. Një ditë pas publikimit të materialit, prokuroria regjistroi një hetim për veprën penale të ushtrimit të ndikimit ndaj personave që ushtrojnë funksione publike.
Opozita i kërkoi prokurorisë të hetojë për korrupsion Denar Bibën dhe Sekretarin e Përgjithshëm të Kryeministrisë, Engjëll Agaçi, për shantazh ndaj Biankut.
Opozita pretendon, se e ka shantazhuar Biba duke i kërkuar të mbështesë qeverinë në kërkesën drejtuar gjykatës së Strasburgut, për të shtyrë ekzekutimin e vendimeve për çështjen e kompensimit dhe kthimit të pronave.
Biba i ka mohuar akuzat, ndërsa gjykata e Strasburgut në një reagim për Tv Klan sqaroi, se biseda e përgjuar nuk ka ndikuar në marrjen e vendimit të saj, për të aprovuar kërkesën e qeverisë shqiptare.
